उपमुख्यमंत्री अजित पवार यांच्या निधनाने संपूर्ण महाराष्ट्र हळहळला. बारामतीजवळच्या काही सभांसाठी अजित पवार हे बुधवारी सकाळी ८ च्या सुमारास मुंबईहून विमानाने निघाले होते. मात्र बारामती विमातळाच्या जवळ आल्यानंतर त्याचं प्लेन अचानक खाली कोसळून मोठ्ठा स्फोट झाला आणि आग लागली. त्यानंतर आणखीही काही स्फोट झाले. या दुर्दैवी अपघातात अजित पवार यांचा मृत्यू झाला. तसेच विमानात त्यांच्यासोबत असलेले अंगरक्षक विदीप जाधव, विमानाचे पायलट सुमीत कपूर, को-पायलट शांभवी पाठक आणि फ्लाइट अटेंडंट पिंकी माळी यांचाही मृत्यू झाला. अजित पवारांच्या आक्मिक निधनाने अख्खा महाराष्ट्र हादरला आहे.
दरम्यान , अजित दादांच्या निधनाची बातमी ऐकून त्यांच्या एका समर्थकाचाही मृत्यू झाल्याची दुर्दैवी घटना घडल्याचे समोर आले आहे. अजित दादांच्या निधनाचा धक्का सहन न झाल्याने समर्थकाचे निधन झालं. नाशिकमध्ये ही धक्कादायक घटना घडली आहे. मिळालेल्या माहितीनुसार सुदाम बोडके असे मृत समर्थकाचे नाव असून ते ६३ वर्षांचे होते. सुदाम बोडके हे अजित पवार यांचे कट्टर समर्थक म्हणून परिचित होते.
सुदाम बोडके हे दिंडोरी तालुक्यातील ढकांबे गावचे रहिवासी होते. बुधवारी अजित पवार यांचे विमान अपघातात निधन झालं. मात्र अजित पवार यांच्या मृत्यूची बातमी ऐकून सुदाम बोडके यांना तीव्र धक्का बसला. ही बातमी ऐकल्यावर ते अचानक अस्वस्थ झाले. त्यांच्यावर काही उपचार करण्यापूर्वीच बोडके यांना हृदयविकाराचा तीव्र झटका आला आणि त्यातच त्यांचंही निधन झाले. अजित दादांच्या जाण्याने समर्थकालाही धक्का बसून त्याची प्राणज्योत मालवल्याने सगळे हळहळले.
