NEET पेपरफुटी प्रकरणावर देशात मोठा गदारोळ निर्माण झाला आहे. या प्रकरणावरून cjp ने आंदोलन सुरु केलेलं असून या आंदोलनाला विद्यार्थ्यांनी मोठा प्रतिसाद दिला आई. या आंदोलनादरम्यान पोलिसांकडून विद्यार्थ्यांवर लाठीचार्ज करण्यात आला आहे. यामुळे एक नवीनच वाद उफाळला असून आता एक मोठी बातमी समोर आली आहे.
NEET पेपरफुटी प्रकरणावर प्रथमच प्रतिक्रिया देत पंतप्रधान नरेंद्र मोदी यांनी दोषींवर कठोर कारवाई करण्याचा निर्धार व्यक्त केला आहे. सोशल मीडियावर पोस्ट शेअर करत त्यांनी पेपरफुटीच्या प्रकरणांचा जलद निपटारा करण्यासाठी फास्ट-ट्रॅक न्यायालये स्थापन करण्याची घोषणा केली.
दिल्लीतील CJP आंदोलन आणि NEET पेपरफुटी प्रकरणावरून देशभरात सुरू असलेल्या चर्चेच्या पार्श्वभूमीवर पंतप्रधान नरेंद्र मोदी यांनी ही महत्त्वाची भूमिका मांडली आहे. त्यांनी स्पष्ट केले की, देशातील तरुणांचे हित आणि त्यांचे भविष्य हे केंद्र सरकारचे सर्वोच्च प्राधान्य आहे.
आपल्या पोस्टमध्ये पंतप्रधान मोदी म्हणाले की, “देशातील तरुणांचे कल्याण आणि त्यांचे भविष्य यापेक्षा अधिक महत्त्वाचे काहीही नाही. प्रश्नपत्रिका फुटीच्या सर्व प्रकरणांमध्ये दोषींवर कठोर कारवाई केली जाईल.”
याशिवाय, अशा प्रकरणांचा जलद निपटारा करण्यासाठी फास्ट-ट्रॅक न्यायालयांची स्थापना करण्यात येणार असल्याची घोषणा त्यांनी केली. संबंधित विभागांना आवश्यक ती तातडीची कारवाई करण्याच्या सूचनाही देण्यात आल्याचे त्यांनी नमूद केले.
दरम्यान, NEET पेपरफुटी प्रकरणावरून विरोधकांकडून केंद्र सरकारवर टीका होत असून, केंद्रीय शिक्षणमंत्री धर्मेंद्र प्रधान यांच्या राजीनाम्याची मागणीही केली जात आहे. अशा परिस्थितीत पंतप्रधान नरेंद्र मोदी यांनी प्रथमच सार्वजनिक भूमिका घेतल्याने या प्रकरणाला नवे राजकीय वळण मिळण्याची शक्यता व्यक्त केली जात आहे.
