मनमाड (भ्रमर वार्ताहर) :- शिवसेना ठाकरे गटाचे उपजिल्हाप्रमुख तथा माजी नगरसेवक संतोष बळीद (वय 54) यांचे कार अपघातात निधन झाले. नाशिक येथे लग्न समारंभ आटोपल्यानंतर ते लासलगावमार्गे मनमाडला जात असताना निंबाळे ते रायपूर दरम्यान वाहेगाव साळ येथे त्यांच्या वाहनाला अपघात झाला.
संतोष बळीद यांनी अनेक वर्ष शिवसेनेचे मनमाड शहर प्रमुखपद भूषवले. तसेच मनमाड नगरपरिषदेचे दोन पंचवार्षिक नगरसेवक होते. त्यांनी जनतेच्या प्रश्नांवर अनेक आंदोलने केली. संतोष बळीद यांच्या निधनाने एक लढवय्या कार्यकर्ता हरपल्याची भावना व्यक्त होत आहे. सर्वपक्षीय नेते कार्यकर्त्यांशी त्यांचे राजकारणापलिकडे संबंध होते. त्यामुळे मनमाडमधील नागरिकांवर शोककळा पसरली आहे.
संतोष बळीद हे गेल्या 30 वर्षांपासून मनमाड शहराच्या राजकारणातील महत्त्वाचे नाव होते. शिवसेना शहर प्रमुखपद भूषवताना त्यांनी कठीण परिस्थितीत पक्षाची बांधणी केली होती. हाडाचे लढवय्ये शिवसैनिक असलेले बळीद हे वीजग्राहक संघटनेच्या माध्यमातून सामान्य जनतेशी जोडले गेले होते. शेकडो आंदोलने, प्रसंगी स्वत:वर गुन्हे नोंदवून घेत त्यांनी जनतेचे प्रश्न सोडवले. सध्याच्या ठाकरे गटाच्या अवघड काळातही त्यांनी निष्ठेने पक्षाचे काम सुरु ठेवले होते.
सन 2001 च्या नगरपालिका निवडणुकीपासून त्यांची कारकीर्द सुरु झाली. त्याआधी माजी आमदार राजेंद्र देशमुख यांचे ते स्वीय सहाय्यक होते. सच्चे शिवसैनिक असलेले संतोष बळीद यांचे सामान्य नागरिकांशी जिव्हाळ्याचे नाते होते.
