मुंबई : कर्नाटकात वादळी वाऱ्यासह पाऊस झाला आहे. महाराष्ट्रात देखील पावसाचा अंदाज वर्तवण्यात आला आहे. मराठवाडा आणि आसपासच्या परिसरात सायक्लोनिक सर्क्युलेशनमुळे कमी दाबाचा पट्टा तयार झाला आहे.
त्यामुळे वातावरणात हवापालट होत आहे. मराठवाड्याला या सायक्लोनिक सर्क्युलेशनचा धोका अधिक आहे. बंगालच्या खाडीत देखील कमी दाबाचा पट्टा तयार झाला आहे.
राज्यात पुढचे चार ते पाच दिवस वादळी वाऱ्यासह विजांचा कडकडाट आणि ढगांच्या गडगडाटासह मुसळधार पावसाचा इशारा देण्यात आला आहे.
या कालावधीमध्ये काही ठिकाणी 40 तर काही ठिकाणी 60 किमी ताशी वेगाने वारे वाहणार आहेत. अवकाळी पाऊस आणि अतिवृष्टीचा इशारा देण्यात आला आहे.
हवामान विभागाने दिलेल्या माहितीनुसार , मध्य महाराष्ट्र आणि मराठवाड्यात हवापालट पुढचे पाच दिवस पाहायला मिळणार आहे. तसेच काही भागात गारपिटीचा इशारा देखील देण्यात आला आहे.
पुढच्या 48 तासात मराठवाड्यात 38 ते 45 डिग्री तापमान राहील. विदर्भात मागच्या 24 तासात सर्वाधिक तापमानाची नोंद करण्यात आली आहे. मराठवाडा आणि विदर्भासाठी पुढचे 48 तास महत्त्वाचे आहेत.
महाराष्ट्रात 2-4 डिग्री तापमानात घट होण्याची शक्यता आहे. तर दिवसा तापमान वाढण्याची शक्यता आहे. कमाल तापमानात पश्चिम महाराष्ट्र आणि उत्तर महाराष्ट्रात कोणताही बदल होणार नाही. मात्र किमान तापमानात घट होऊ शकते असा अंदाज हवामान विभागानी वर्तवला आहे.
ठाणे, रायगड, रत्नागिरी, सिंधुदुर्ग, धुळे, या जिल्ह्यात यलो अलर्ट, तर नाशिक, जळगाव, नाशिक घाटमाथा, पुणे, कोल्हापूर, घाटमाथा, सातारा, सांगली, इथे काही भागात ऑरेंज तर काही भागात यलो अलर्ट देण्यात आला आहे. आज आणि उद्या संपूर्ण महाराष्ट्रात कमी अधिक प्रमाणात पाऊस राहणार आहे.
कमी दाबाचा पट्टा तयार झाल्याने अवकाळी पावसाचं संकट पुढचे 48 तास महाराष्ट्रावर राहणार आहे. त्यानंतर पुढचे दोन दिवस विदर्भ आणि मराठवाड्यातील काही जिल्ह्यांमध्ये पावसाचा इशारा देण्यात आला आहे. त्यामुळे शेतकरी आणि नागरिकांना काळजी घेण्याचं आवाहन केलं आहे.
