नाशिक (भ्रमर प्रतिनिधी) :- तपोवन ते वृक्षतोड प्रकरणांमध्ये आता मनसे अध्यक्ष राज ठाकरे हे देखील सहभागी झाले असून त्यांनी एक पोस्ट टाकून साधूंच्या नावावरती संधी साधूपणा करू नका नाहीतर गंभीर परिणाम सहन करावे लागतील असा इशारा दिला आहे.
नाशिकमध्ये आगामी सिंहस्थ कुंभमेळ्याच्या तयारीसाठी प्रशासनाच्या वतीने काम सुरू झालेली आहे. नाशिकमध्ये होत असलेल्या पूर्ण कुंभमेळ्यासाठी म्हणून पाचपट गर्दी होण्याची शक्यता व्यक्त केली जात आहे. या सर्व पार्श्वभूमीवर तपोवनात होणारी गर्दी लक्षात घेऊन या ठिकाणी वृक्षतोड करण्याचा निर्णय प्रशासनाने घेतला आहे. आता प्रशासनाच्या या निर्णयाला मोठ्या प्रमाणावर विरोध होत आहे.
आत्तापर्यंत वृक्षप्रेमी व नागरिक विरोध करत होते आता मात्र विविध राजकीय नेत्यांकडून देखील विरोध होऊ लागलेला आहे. त्याला मोठ्या प्रमाणावर वृक्षप्रेमी व नागरिक विरोध करत आहे. काल शिवसेना उबाठा शिवसेनेचे कार्याध्यक्ष उद्धव ठाकरे यांनी या सर्व प्रकरणाला विरोध केला होता आणि नागरिकांबरोबर असल्याचे सांगितले होते.
या सर्व प्रकरणावरती मनसे अध्यक्ष राज ठाकरे यांनी आज एक पोस्ट टांकली आहे. त्यामध्ये प्रशासनावर निशाणा साधला असून ज्यावेळी मनसेची सत्ता नाशिकमध्ये होती. त्यावेळी देखील कुंभमेळा झाला आणि सर्वांशी समन्वय साधून प्रशासनाशी आम्ही एकत्र राहून कोणतीही वृक्षतोड केली नाही. पायाभूत सुविधा दिल्या याची आठवण करून देताना राज ठाकरे यांनी म्हटले आहे की जर साधूंच्या नावावर संधी साधूपणा करून उद्योगपतींच्या घशात जमीन घालण्याचा आणि त्यांना जवळ करण्याचा प्रयत्न केला गेला तर मोठे गंभीर परिणाम सहन करावे लागतील, असा इशारा देखील राज ठाकरे यांनी टाकलेल्या पोस्टमध्ये दिला आहे.
