अंबड लिंक रोडलगतच्या म्हाडा कॉलनी परिसरात शुक्रवारी रात्री एका युवकाने आयुष्य संपवल्याची हृदयद्रावक घटना घडली आहे. अमोल ज्ञानेश्वर चौधरी (मूळ राहणार – धरणगाव, जि. जळगाव) असे मृत युवकाचे नाव असून तो पत्नी आणि लहान मुलासह म्हाडा कॉलनीतील दत्त मंदिर शेजारी राहत होता. रात्री घरातील इतर सदस्य झोपेत असताना अमोलने टोकाचा निर्णय घेतला. या घटनेने संपूर्ण परिसरात शोककळा पसरली असून नागरिकांत हळहळ व्यक्त केली जात आहे.
शनिवारी सकाळी पत्नी घरातील स्वयंपाकघरात गेली असता तिला हा धक्कादायक प्रकार समोर दिसला. परिस्थिती पाहून ती क्षणात कोसळली, तिच्या आरडाओरड केल्यानंतर शेजारील नागरिकांनी तात्काळ धाव घेत याबाबत पोलिसांना माहिती दिली. एमआयडीसी चुंचाळे पोलीस तातडीने घटनास्थळी दाखल झाले.
स्थानिकांच्या मदतीने अमोल याला जिल्हा शासकीय रुग्णालयात दाखल करण्यात आले, परंतु वैद्यकीय अधिकाऱ्यांनी त्याला तपासून मृत घोषित केले.
दरम्यान, अमोलने असा टोकाचा निर्णय का घेतला, याचा तपास पोलीस पथकाकडून सुरू आहे. घरातील वातावरण, कोणताही मानसिक ताणतणाव किंवा सामाजिक कारणे याबाबतही पोलिसांकडून पडताळणी केली जात आहे.
