नवीन नाशिक (भ्रमर प्रतिनिधी) - घराची चावी विश्वासाने ठेवण्याकरिता शेजार्यांकडे दिली असता दोन महिलांनी संगनमत करून महिलेच्या घरातील सुमारे चार तोळ्यांचे दागिने चोरून नेल्याची घटना अंबड येथे घडली.
याबाबत पोलिसांनी दिलेली माहिती अशी, की फिर्यादी कीर्ती सुनील काजळे (रा. गिरीधर अपार्टमेंट, अंबड) आणि आरोपी मनीषा प्रशांत माळी व लता जाधव या तीनही महिला एकाच सोसायटीत राहतात. काजळे यांनी दि. 10 जून ते 12 ऑगस्ट 2025 या कालावधीत राहत्या घराची चावी विश्वासाने ठेवण्याकरिता दिली होती.
फिर्यादी यांच्याशेजारी राहणारी आरोपी मनीषा माळी व तिची नणंद लता जाधव यांनी संगनमत करून फिर्यादीच्या राहत्या घरात प्रवेश करून 3 लाख 60 हजार रुपये किमतीची 40 ग्रॅम वजनाची सोन्याची पोत, 18 हजार रुपये किमतीचे सोन्याचे डोरले व 27 हजार रुपये किमतीचे तीन ग्रॅम वजनाचे सोन्याचे वेल असे एकूण 4 लाख 5 हजार रुपये किमतीचे सोन्याचे दागिने चोरून नेले. या प्रकरणी अंबड पोलीस ठाण्यात दोन महिलांविरुद्ध गुन्हा दाखल करण्यात आला असून, पुढील तपास पोलीस हवालदार जगताप करीत आहेत.
