भारत-अमेरिका संबंधांमध्ये पुन्हा एकदा सकारात्मक घडामोडी घडताना दिसत आहेत. टॅरिफ वादामुळे दोन्ही देशांमधील संबंधांमध्ये तणाव निर्माण झाला होता. मात्र, आता ट्रम्प प्रशासनाने भारताच्या चार कंपन्यांवरील निर्बंध हटवण्याचा निर्णय घेतला आहे. या निर्णयामुळे व्यापार क्षेत्रात नवे संकेत मिळत असून, भारत-अमेरिका ट्रेड डीलच्या चर्चांनाही वेग येण्याची शक्यता आहे.
अमेरिकेच्या अर्थ खात्याने ही बंदी हटवण्याचा निर्णय घेतला. या चार कंपन्यांमध्ये हैदराबाद स्थित आरआरजी इंजीनियरींग टेक्नोलॉजीज प्रायवेट लिमिटेड, लोकेश मशीन्स लिमिटेड, अहमदाबाद स्थित गॅलेक्सी बेयरिंग्स लिमिटेड आणि दिल्ली स्थित शौर्य एरोनॉटिक्स प्रायवेट लिमिटेड या त्या चार कंपन्या आहेत. अमेरिकेच्या वित्त विभागाने या चार कंपन्यांना स्पेशली डेजिग्नेटेड नॅशनल्स (SDN) लिस्ट मधून बाहेर काढलं आहे. या लिस्टमध्ये ज्या कंपन्या आणि व्यक्ती असतात, त्यांची प्रॉपर्टी जप्त केली जाते.
अमेरिकी परराष्ट्र संपत्ती नियंत्रण कार्यालयाच्या प्रतिबंधांच्या लिस्टमध्ये या चार कंपन्या होत्या. जवळपास दोन वर्षानंतर हे पाऊल उचलण्यात आलं आहे. वर्ष 2024 मध्ये OFAC ने कार्यकारी आदेशातंर्गत 19 भारतीय कंपन्यांवर निर्बंध घातले होते. यात 19 कंपन्या आणि दोन व्यक्ती होते. रशियन सरकारची मदत करणाऱ्या कंपन्या आणि लोकांना OFAC अंतर्गत टार्गेट करण्यात येतं.
सार्वजनिकरित्या लिस्टेड कंपन्या
2022 साली रशियाने युक्रेनवर हल्ला केला. त्यानंतर रशियावर प्रतिबंध घालण्यात आले. हे प्रतिबंध मोडून रशियाला मदत करणाऱ्या कंपन्यांवर अमेरिकेकडून कारवाई करण्यात आली होती. या मुद्यावर अमेरिकेसोबत चर्चा केल्याच भारताकडून सांगण्यात आलं होतं. निर्बंध हटवण्यात आलेल्या चार कंपन्यांपैकी दोन कंपन्या गॅलेक्सी बियरिंग्स लिमिटेड आणि लोकेश मशीन्स लिमिटेड सार्वजनिकरित्या लिस्टेड कंपन्या आहेत. लोकेश मशीन्सच्या ग्राहकांमध्ये अनेक ग्लोबल कंपन्यांचा समावेश आहे.
