केंद्रीय निवडणूक आयोगाने पत्रकार परिषद घेत जम्मू काश्मीर आणि हरियाणा विधानसभा निवडणुका जाहीर केल्या आहेत. जम्मू-काश्मीरमधून कलम ३७० हटवल्यानंतर पहिल्यांदाच विधानसभा निवडणुका होणार असल्याने देशाचे डोळे लागले आहेत. जम्मू काश्मीरमध्ये सुरक्षेच्या कारणास्तव तीन टप्प्यात, तर हरियाणात एकाच टप्प्यात निवडणुका होणार आहेत. जम्मू काश्मीरमध्ये १८ सप्टेंबर, २५ सप्टेंबर, १ ऑक्टोबर रोजी मतदान होणार आहे. तर हरियाणात एकाच टप्प्यात एक ऑक्टोबरला मतदान प्रक्रिया होईल. हरियाणामध्ये १ ऑक्टोबरला मतदान होणार असून ४ ऑक्टोबरला मतमोजणी होणार आहे. दोन्ही विधानसभा निवडणुकांसाठी चार ऑक्टोबरला मतमोजणी होऊन निकाल जाहीर होईल.
केंद्रीय निवडणूक आयोगाची आज पत्रकार परिषद झाली. या पत्रकार परिषदेत विधानसभा निवडणुकांची घोषणा करण्यात आली आहे. मुख्य निवडणूक आयुक्त राजीव कुमार म्हणाले की, “२०२४ च्या लोकसभा निवडणुका ही जागतिक पातळीवरील सर्वात मोठी निवडणूक प्रक्रिया होती. ती यशस्वीपणे आणि शांततेने पार पडली. संपूर्ण लोकशाही जगासाठी एक अतिशय मजबूत लोकशाही पृष्ठभाग निर्माण केला, ती कोणत्याही प्रकाराशिवाय शांततापूर्ण होती. संपूर्ण देशाने निवडणुकीचा सण साजरा केला आणि जगात पहिल्यांदाच सर्वाधिक मतदान झाले.
आम्ही अलीकडेच जम्मू-काश्मीर आणि हरियाणा या ठिकाणच्या निवडणुकीच्या तयारीचा आढावा घेण्यासाठी भेट दिली. लोकांमध्ये मोठा उत्साह दिसून आला. त्यांना निवडणूक प्रक्रियेत सहभागी व्हायचे आहे. लोकांना निवडणुका व्हाव्यात अशी इच्छा आहे. लोकसभा निवडणुकीच्या वेळी जम्मू-काश्मीरमधील मतदान केंद्रावर लागलेल्या लांबलचक रांगा हा पुरावा आहे की, लोकांना केवळ बदल हवाच नाही तर त्या बदलाचा एक भाग बनून त्यांचा आवाजही उठवायचा आहे आणि लोकशाही दाखवते की, लोकांना त्यांचे नशीब स्वतःच लिहायचे आहे. असेही ते म्हणाले.
“जम्मू आणि काश्मीरमध्ये एकूण 90 विधानसभा मतदारसंघ आहेत, त्यापैकी 74 सर्वसाधारण, SC-7 आणि ST-9 आहेत. जम्मू-काश्मीरमध्ये एकूण 87.09 लाख मतदार असतील. ज्यामध्ये 44.46 लाख पुरुष, 42.62 लाख महिला, 3.71 लाख प्रथमच मतदार आणि 20.7 लाख तरुण मतदार आहेत.
जम्मू-काश्मीरमध्ये विधानसभेच्या जागांची संख्या 90 झाली आहे. आता जम्मूमध्ये 43 आणि काश्मीरमध्ये 47 जागा असतील. PoK साठी फक्त 24 जागा राखीव आहेत. येथे निवडणूक होऊ शकत नाही. तर लडाखमध्ये विधानसभा नाही. अशा प्रकारे एकूण 114 जागा असून त्यापैकी 90 जागांवर निवडणूक होणार आहे. जम्मू प्रदेशात सांबा, कठुआ, राजौरी, किश्तवाड, डोडा आणि उधमपूरमध्ये प्रत्येकी एक जागा वाढवण्यात आली आहे. त्याचवेळी काश्मीर भागातील कुपवाडा जिल्ह्यात एक जागा वाढवण्यात आली आहे.
दरम्यान , निवडणूक आयोगाचे मुख्य निवडणूक आयुक्त राजीव कुमार म्हणतात की, हरियाणात दोन कोटींहून अधिक मतदार आहेत. 90 पैकी 73 जागा सर्वसाधारण आहेत. हरियाणात 27 ऑगस्ट रोजी मतदार यादी प्रसिद्ध होणार आहे. हरियाणात 20 हजार 269 मतदान केंद्रे आहेत.
