गँगस्टर लॉरेन्स बिष्णोईचा भाऊ अनमोल बिष्णोईला अटक करण्यात आल्याची मोठी बातमी समोर आली आहे, पण याप्रकरणी मुंबई पोलीस किंवा दिल्ली पोलिसांनी अधिकृत प्रतिक्रिया दिलेली नाही. अनमोल बिश्नईला अमेरिकेच्या कॅलीफोर्नियामधून अटक करण्यात आल्याची माहिती आहे.
सुत्रांकडून मिळत असलेल्या माहितीप्रमाणे दोन आठवड्यांपूर्वीच गँगस्टर अनमोल बिश्नोईविरोधात अजामीनपात्र वारंट जारी करण्यात आलं होतं. आता अमेरिकन सरकार अनमोल बिश्नोईला भारताच्या स्वाधीन करणार आहे. प्रत्यार्पणाच्या हालचालींना वेग आला आहे. भारत सरकारकडून अनमोल बिश्नोईला भारतात आणण्याचा प्रयत्न सुरू आहे, अनमोल बिश्नोईच्या अटकेनंतर आता अनेक मोठे खुलासे होण्याची शक्यता आहे.
अभिनेता सलमान खानच्या घराबाहेर गोळीबार करण्यात आला होता, या प्रकरणात अनमोल बिश्नोई वॉन्टेड आहे. मुंबई पोलिसांकडून त्याचा समावेश हा मोस्ट वॉन्टेड आरोपींच्या यादीमध्ये करण्यात आला आहे.त्याचा शोध सुरू असतानाच त्याला अमेरिकेतून अटक करण्यात आल्याची माहिती समोर येत आहे.दोन आठवड्यांपूर्वीच गँगस्टर अनमोल बिश्नोईविरोधात अजामीनपात्र वारंट जारी करण्यात आलं होतं. त्यानंतर त्याला आता अटक करण्यात आली आहे.
दरम्यान काही दिवसांपूर्वी राष्ट्रवादी अजित पवार गटाचे नेते बाबा सिद्दिकी यांच्यावर गोळीबार करण्यात आला होता. या घटनेत ते गंभीर जखमी झाले होते. रुग्णालयात उपचार सुरू असताना त्यांचा मृत्यू झाला. दरम्यान बाबा सिद्धीकी यांच्या हत्येची जबाबदारी लॉरेंस बिष्णोई गँगने घेतली होती. त्यानंतर या प्रकरणातील आरोपीना अटक करण्यात आली आहे.
