रस्ते अपघातांच्या घटनांमध्ये दिवसेंदिवस वाढ होत आहे. अशातच साताऱ्यातून एक भीषण अपघाताची बातमी समोर येत आहे. सातारा-लोणंद मुख्य रस्त्यावर शनिवारी मध्यरात्री मिनी ट्रॅव्हल्स आणि ट्रकचा भीषण अपघात घडला. या अपघातात तीन जणांचा मृत्यू झाला असून, आठ जण गंभीर जखमी असल्याची माहिती समोर आली आहे.
याबाबत मिळालेल्या माहितीनुसार , मिनी ट्रॅव्हल्स बस इचलकरंजीहून उज्जैनला देवदर्शनासाठी निघाली होती. या दरम्यान, सालपे गावाजवळ हा भीषण अपघात घडला. अपघातग्रस्तांना तातडीने रूग्णालयात नेण्यात आले. जखमींवर सध्या खासगी रूग्णालयात उपचार सुरू आहेत.
दोघांचा जागीच, एकीचा उपचारादरम्यान मृत्यू या अपघातात ट्रॅव्हल्स चालक सलमान इम्तियाज सय्यद (वय वर्ष २४), तसेच रजनी संजय दुर्गुळे (वय वर्ष ४८, रा. पेठ वडगाव, ता. हातकणंगले) या दोघांचा जागीच मृत्यू झाला. तसेच अपघातात गंभीर जखमी झालेल्या एका महिलेला सातारा सिव्हिल हॉस्पिटलमध्ये नेण्यात आले, मात्र उपचारादरम्यान तिचाही मृत्यू झाला.
नेमकं काय घडलं ?
इचलकरंजी येथून निघालेली मिनी ट्रॅव्हल्स बस उज्जैनकडे भाविकांना घेऊन जात होती. ही ट्रॅव्हल्स शनिवारी रात्री वाठार स्टेशन मार्गे सालपे घाट उतरत असताना समोरून येणाऱ्या ट्रकने जोरदार धडक दिली. धडक इतकी भीषण होती की टेम्पो आणि ट्रॅव्हलरचे मोठे नुकसान झाले आणि अनेक प्रवासी जखमी झाले. या दुर्देवी अपघातात तिघांचा मृत्यू तर, आठ जण गंभीर जखमी असल्याची माहिती समोर आली आहे.
दरम्यान घटनेची माहिती मिळताच लोणंद पोलीस स्टेशनचे अधिकारी आणि कर्मचारी घटनास्थळी दाखल झाले. तसेच मृतदेह शवविच्छेदनासाठी रूग्णालयात पाठवण्यात आले आहे. या घटनेचा पुढील तपास सातारा पोलीस करत आहेत.
