गुजरातचे राज्यपाल आचार्य देवव्रत यांनी महाराष्ट्राचे प्रभारी राज्यपाल म्हणून आज राजभवनात शपथ घेतली. देवव्रत यांच्याकडे सध्या गुजरातची जबाबदारी आहे. आज त्यांनी संस्कृतमध्ये शपथ घेतली. राज्यपाल सी. पी. राधाकृष्णन यांची देशाच्या उपराष्ट्रपतिपदी निवड झाल्याने राज्याच्या राज्यपालपदाचा कार्यभार गुजरातचे राज्यपाल आचार्य देवव्रत यांच्याकडे सोपविण्यात आला आहे.
यावेळी मुख्यमंत्री देवेंद्र फडणवीस, उपमुख्यमंत्री एकनाथ शिंदे उपस्थित होते. रविवारी दुपारी तेजस एक्स्प्रेसने देवव्रत हे पत्नी दर्शना देवी यांच्यासह मुंबईत दाखल झाले होते. यातून त्यांचा साधेपणा दिसून आला होता. रेल्वे स्थानकावर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी त्यांचे स्वागत केले.
दरम्यान, राज्यपालांचे आगमन होताच मुंबई पोलिसांकडून त्यांना मानवंदना देण्यात आली. त्यानंतर देवव्रत यांचा ताफा मुख्यमंत्री फडणवीस आणि उपमुख्यमंत्री शिंदे यांच्यासह राजभवन येथे दाखल झाला.
