प्रेमात माणूस आंधळा होता असे म्हटले जाते. जात, धर्म , संपत्ती , रंग , रूप हे प्रेमात पाहिलं जात नाही असं म्हणतात. पण याच आंधळ्या प्रेमामुळे अनेकांच्या आयुष्याचा शेवट होतो, तो ही भयंकर. उत्तर प्रदेशातील झाशी येथीलही एका लव्हस्टोरीचा भयंकर शेवट झाला आहे. झालेल्या घटनेत सासरचे लोक याला आत्महत्या म्हणत आहेत, तर मुलीचे पालक हत्या झाल्याचा दावा करत आहे.
अलिगोल खिडकी परिसरातील रहिवासी असलेली २१ वर्षीय मेहक तिच्या खोलीत गळफास घेतलेल्या अवस्थेत आढळली. मेहकने दीड वर्षांपूर्वी पळून जाऊन विवेक अहिरवार या हिंदू तरुणाशी लग्न केलं होतं. मेहकची आई गुडिया हिचा आरोप आहे की, जावई विवेक आणि त्याचं कुटुंब सतत मुलीचा छळ करत होतं आणि शेवटी तिची हत्या केली.
विवेक अहिरवार हा त्यांच्या शेजाऱ्याच्या घरी वारंवार येत असे. तिथेच त्याची मेहकशी भेट होऊ लागली आणि त्यांची मैत्री हळूहळू प्रेमात बदलली. धर्म आणि समाजाकडे दुर्लक्ष करून दोघांनी एकत्र राहण्याचा निर्णय घेतला. ७ मार्च २०२४ रोजी विवेक मुलीसोबत पळून गेला. आम्ही पोलीस स्टेशनमध्ये तक्रार दाखल केली, पण कोणतीही कारवाई झाली नाही. असे महक च्या आईने म्हटले आहे.
त्यानंतर पुढे त्या म्हणाल्या कि, सुमारे दोन महिन्यांनंतर आम्हाला कळलं की त्यांनी लग्न केलं आहे आणि ते इम्लीपुरा परिसरात भाड्याच्या घरात राहत आहेत. लग्नानंतर काही महिने सर्व काही सुरळीत चाललं. पण नंतर विवेक तिच्याकडे पैसे मागायला सुरुवात केली. जेव्हा मागण्या पूर्ण झाल्या नाहीत तेव्हा मारहाण आणि मानसिक छळ करण्यात आला. मुलीने एकदा रेफ्रिजरेटर हवा आहे असं सांगितलं, म्हणून आम्ही कशी तरी पैशाची व्यवस्था केली आणि तिला घेऊन दिला.
तरीही सासरचे समाधानी नव्हते. मेहक अनेक दिवस तिच्या आईवडिलांच्या घरी राहिली. याच दरम्यान विवेक आणि त्याच्या कुटुंबाने वारंवार माफी मागितली. आईला वाटलं की कदाचित आता सर्व काही ठीक होईल. म्हणून मुलीला तिच्या सासरच्या घरी परत पाठवण्यात आलं.
महकच्या आईने स्पष्ट केलं की, ९ ऑक्टोबर रोजी संपूर्ण कुटुंब कामासाठी इंदूरला गेलं होतं. रविवारी मेहकने गळफास घेतल्याची बातमी मिळाली. आम्ही लगेच झाशीला परतलो, पण तोपर्यंत खूप उशीर झाला होता. आम्ही पोहोचलो तोपर्यंत पोलिसांनी पंचनामा करून पोस्टमॉर्टम केलं होतं. आम्हाला सांगण्यात आलं की तिने आत्महत्या केली आहे, पण आमचा त्यावर विश्वास बसत नाही. विवेक आणि त्याच्या कुटुंबाने माझ्या मुलीची हत्या केली. असा आरोप मेहक च्या कुटुंबाने केला आहे.
