दिल्ली येथे झालेल्या स्फोटाने फक्त दिल्लीच नाही संपूर्ण देश हादरला आहे. त्यानंतर संपूर्ण देशात हाय अलर्ट जारी करण्यात आला आहे. सोमवारी सायंकाळी 6.52 वाजता ऐतिहासिक लाल किल्ल्याजवळील लाल किल्ला मेट्रो स्टेशनच्या गेट क्रमांक 1 जवळून जाणाऱ्या एका कारमध्ये भयंकर स्फोट झाला.
दिल्लीतील या स्फोटात आतापर्यंत 9 जण ठार व 24 जण जखमी झाले. या स्फोटात अनेकांचे हात-पाय, शरीराच्या विविध भागांचे अवयव उडाल्याचे देखील समोर आले. स्फोटात जवळपास 32 गाड्यांच्या चिंधड्या उडाल्याय. दरम्यान, सदर प्रकरणी एएनआयकडून कसून तपास सुरु आहे.
या चौकशीत एक धक्कादायक माहिती समोर आली आहे. दिल्ली स्फोटात जैश ए मोहम्मदचा हात असल्याचा संशय बळावला. ताब्यात घेतलेला डॉ. उमर हा जैश ए मोहम्मदशी संबंधित असल्याचं समोर आलं आहे. ऑपरेशन सिंदूरमध्ये भारताने जैश ए मोहम्मदला मोठा दणका दिला होता.
दिल्लीतील लाल किल्ला स्फोटात सहभागी असलेल्या फरिदाबाद-सहारापूर जैश-ए-मोहम्मद मॉड्यूलचे पुरावे गुप्तचर संस्थांना मिळाले आहेत. वरिष्ठ गुप्तचर सूत्रांनुसार, हरियाणा नोंदणी क्रमांक असलेली कार उमर मोहम्मदची होती, जो फरिदाबाद-सहारापूर जैश-ए-मोहम्मद मॉड्यूलशी संबंधित होता.
कालच्या छाप्यानंतर, हे व्यक्ती दुसऱ्या ठिकाणी स्फोट घडवण्याचा विचार करत होते, परंतु लाल किल्ल्याजवळ चुकून स्फोटचं ट्रिगर दाबल्याने तिकडे स्फोट झाला. गुप्तचर अधिकाऱ्यांनी उमर मोहम्मदच्या काही सहकाऱ्यांची ओळख पटवली आहे आणि इतरांची ओळख पटवण्याचे प्रयत्न सुरू आहेत.
