२०२५ मध्ये अमेरिकेचे अध्यक्ष डोनाल्ड ट्रम्प यांच्या टॅरिफ बॉम्बची चर्चा होती. टॅरिफमुळं अमेरिकेचा महसूल वाढला असा दावा ट्रम्प यांच्याकडून करण्यात येत असला तरी प्रत्यक्षात चित्र मात्र वेगळं आहे. २०२५ मध्ये दिवाळखोरीत जाणाऱ्या कंपन्यांची संख्या मोठ्या प्रमाणावर वाढली आहे. विशेष म्हणजे गेल्या १५ वर्षांचा उच्चांक दिवाळखोरीत निघणाऱ्या कंपन्यांच्या संख्येनं गाठला आहे. ट्रम्प टॅरिफ हे सर्वात मोठं कारण असल्याचं कंपन्या सांगत आहेत.
एका रिपोर्टनुसार २०२५ मध्ये अमेरिकेत कंपन्या दिवाळखोरीत निघण्याची संख्या वाढली आहे. महामंदीनंतर जितक्या कंपन्या दिवाळखोरीत निघाल्या होत्या, तितक्या संख्येनं कंपन्या दिवाळखोरीत निघत आहेत. रिपोर्टनुसार अमेरिकेतील जे व्यवसाय थेट आयातीवर अवलंबून होते, त्यांना दशकातील सर्वाधिक टॅरिफचा सामना करावा लागला. दिवाळखोरीचे अर्ज करणाऱ्या कंपन्यांमध्ये सर्वाधिक वाढ औद्योगिक क्षेत्रात दिसून आली आहे. ज्यात निर्माण, पुनर्निमाण, वाहतूक कंपन्यांचा समावेश आहे. काही व्यवसाय टॅरिफ आणि इतर खर्चांच्या दबावात असल्याचं अर्थतज्ज्ञांनी म्हटलं आहे.
दिवाळखोरीचा अर्ज करणाऱ्या कंपन्यांनी त्यांच्यासमोरील आर्थिक आव्हानांसाठी महागाई, व्याज दरांना जबाबदार धरलं आहे. याशिवाय डोनाल्ड ट्रम्प यांच्या प्रशासनाच्या व्यापारी धोरणामुळं सप्लाय चेनवर परिणाम झाला, यामुळं उत्पादन खर्च वाढल्याचं म्हटलंय. त्यासोबतच नोव्हेंबर महिन्यात संपलेल्या एका वर्षाच्या कालावधीत उत्पादन क्षेत्रातील ७० हजार नोकऱ्या संपल्या आहेत.
