नाशिक (प्रतिनिधी) :- मालकीची जमीन असल्याचे भासवून विश्‍वास संपादन करून नोटरी, साठेखत, करारनामा करून देत शहरातील एका प्रसिद्ध डॉक्टरला चार भामट्यांनी 65 लाख रुपयांना गंडा घातल्याची घटना उघडकीस आली आहे. या फसवणुकीच्या प्रकरणातील आरोपी हे खुनासारख्या गंभीर गुन्ह्यातील गुन्हेगार आहेत.
याबाबत गंगापूर पोलिसांनी दिलेली माहिती अशी, की फिर्यादी हे शहरातील एका प्रसिद्ध डॉक्टर आहेत. दरम्यान, हे फिर्यादी डॉक्टर व त्यांचे पार्टनर हे जागेच्या शोधात होते.
त्यादरम्यान, संशयित मध्यस्थ अरुण भागवत पाटील (मयत), जगदीश कारभारी गावंड (वय 51, रा. अंबड, नाशिक), सोमनाथ काशीनाथ मंडलिक (वय 51, रा. आनंदवल्ली, नाशिक) व दत्तात्रय काशीनाथ मंडलिक (वय 50, रा. चेहेडी नाका, नाशिकरोड) यांनी संगनमत करून कटकारस्थान रचले. त्यानंतर फिर्यादी डॉक्टर व त्यांचे पार्टनर यांच्याशी संपर्क साधून त्यांना मौजे आनंदवल्ली शिवारात स्वत:च्या मालकीची जमीन असल्याचे सांगितले, तसेच आरोपींनी डॉक्टरांशी वेळोवेळी संपर्क साधून त्यांचा विश्‍वास संपादन केला.
अखेर या जमीन खरेदीचा व्यवहार ठरला. आरोपी अरुण पाटील, जगदीश गावंड, सोमनाथ मंडलिक व दत्तात्रय मंडलिक यांनी फिर्यादी डॉक्टर व त्यांचे पार्टनर यांच्या लाभात नोटरी, साठेखत, करारनामा व भरणा पावती केली. त्यानंतर आरोपींनी डॉक्टर व त्यांच्या साक्षीदाराकडून वेळोवेळी टप्प्याटप्प्याने एकूण 65 लाख रुपये रोख स्वरूपात, तसेच आरटीजीएस व धनादेशाद्वारे दिले; मात्र प्रत्यक्षात ही जमीन आरोपींच्या मालकीची नसल्याचे उघड झाल्याने आपली फसवणूक झाल्याचे लक्षात आले.
त्यानंतर डॉक्टरांनी या चारही आरोपींशी संपर्क साधून दिलेली रक्कम परत करण्याची मागणी केली; मात्र हे चारही आरोपी सराईत गुन्हेगार असल्याने त्यांनी पैसे देण्यास नकार दिला, तसेच फसवणूक करून 65 लाख रुपयांचा अपहार केला. हा प्रकार दि. 30 जून 2015 ते दि. 29 ऑक्टोबर 2021 यादरम्यान आरोपी यांच्या आनंदवल्ली येथील राहत्या घरी, तसेच एका नामांकित हॉटेल व एका वकिलाच्या कार्यालयात घडला.
आपली फसवणूक झाल्याची बाब लक्षात आल्यानंतर डॉक्टर व त्यांच्या पार्टनरने गंगापूर पोलीस ठाण्यात चारही आरोपींविरुद्ध फसवणुकीची फिर्याद दिली असून, पुढील तपास सहाय्यक पोलीस निरीक्षक पाटील करीत आहेत.
