मुंबई : राष्ट्रवादी काँग्रेस शरदचंद्र पवार गटाचे अध्यक्ष शरद पवार यांच्या नावानं फसवणूक झाल्याचा प्रकार उघडकीस आला आहे. मुंबई पोलीस दलात हवालदार असलेल्या विजय गायकवाड यांना शरद पवारांच्या नावानं गंडा घालण्यात आलेला आहे. त्यांची तब्बल ९३ लाख रुपयांची फसवणूक झाली आहे.
याबाबत मिळालेली अधिक माहिती अशी की, शरद पवारांचा सहभाग असलेल्या दोन कंपन्यांसोबत भागिदारी करुन देतो, अशी बतावणी करत व्यावसायिकानं ५७ वर्षीय विजय गायकवाड यांना गंडा घातला. गोरेगावात राहणाऱ्या ४८ वर्षीय अपूर्व जगदिश मेहता यांनी गायकवाड यांची फसवणूक केली. २०२० पासून छत्रपती शिवाजी महाराज विमानतळावर तैनात असणाऱ्या गायकवाड यांना गंडा घातला.
गायकवाड आणि मेहता यांची अनेकदा भेट व्हायची. यातूनच दोघांची ओळख झाली. शरद पवारांच्या आदेशावरुन आपण कंपनी सुरु असल्याचं मेहतानं २०२१ मध्ये गायकवाड यांना सांगितलं. मेहतानं गायकवाड यांना भागिदार होण्याचा प्रस्ताव दिला. एका कंपनीला तुमच्या लेकीचं नाव देऊ आणि दुसरी कंपनी तुमच्या मुलाच्या नावानं सुरु करु, अशी ऑफर मेहतानं गायकवाड यांना दिली. तुम्ही शरद पवारांचे व्यावसायिक भागीदार व्हाल. हा व्यवसाय सुरु करण्यासाठी १ कोटी रुपयांची गरज लागेल, असं मेहतानं गायकवाड यांना सांगितलं.
मेहता यांच्यावर विश्वास ठेवून गायकवाड यांनी त्यांचा फ्लॅट विकला, एलआयसीकडून कर्ज घेतलं आणि प्रॉव्हिडंट फंडातून पैसे काढले. मुलांचं भवितव्य सुरक्षित होईल या हेतूनं गायकवाड यांनी मेहताला ९३ लाख रुपये दिले. पण व्यवसाय सुरु झाला नाही. त्यामुळे गायकवाड यांना चिंता वाटू लागली. व्यवसाय का सुरु होत नाही, याबद्दल गायकवाड यांनी मेहताकडे विचारणा केली.
त्यावर पवारांना तुमच्या लेकीच्या कुंडलीत राहू दोष आढळून आला. त्यामुळे तुम्ही दक्षिणेश्वर काली मंदिरात पूजा करा, असा सल्ला मेहतानं दिला. गायकवाड यांनी त्यावरही विश्वास ठेवला आणि कुटुंबासह पूजा केली. यानंतर मेहतानं गायकवाड यांना दिंडोशी कोर्टात बोलावलं. कंपनीची स्थापना करण्याची प्रक्रिया सुरु असल्याचं सांगून त्यानं काही कागदपत्रांवर गायकवाड यांच्या स्वाक्षऱ्या घेतल्या. मेहतानं शरद पवारांच्या नावानं आपली फसवणूक केल्याचं गायकवाड यांच्या लक्षात आलं.
यानंतर गायकवाड यांनी सहार पोलीस स्थानक गाठलं आणि मेहताविरोधात तक्रार दाखल केली. भारतीय न्याय संहितेच्या कलम ४०६ आणि ४२० च्या अंतर्गत मेहताविरोधात गुन्हा नोंदवण्यात आला आहे. मेहताला अद्यापपर्यंत अटक झालेली नाही.
