राज्यातील लाडक्या बहिणी सप्टेंबर महिन्याच्या हफ्त्याची वाट पाहत होत्या. अखेर बहिणीची प्रतीक्षा संपली आहे. दिवाळीपूर्वीच लाडकी बहीण योजनेचे पैसे खात्यात जमा होण्यास सुरुवात होणार आहे. याविषयीची घोषणा महिला आणि बालविकास मंत्री आदिती तटकरे यांनी केली. त्यांनी सोशल मीडिया प्लॅटफॉर्म एक्सवर याविषयीची घोषणा केली.
मुख्यमंत्री माझी लाडकी बहीण योजना ही महिला सक्षमीकरणाची अखंड क्रांती असल्याची पोस्ट त्यांनी सोशल मीडिया एक्सवर केली आहे. मुख्यमंत्री माझी लाडकी बहीण योजनेच्या सर्व पात्र लाभार्थ्यांना सप्टेंबर महिन्याचा सन्मान निधी वितरित करण्याच्या प्रक्रियेस उद्या पासून सुरुवात होत आहे. लवकरच योजनेतील सर्व पात्र लाभार्थ्यांच्या आधार संलग्नित बँक खात्यात सन्मान निधी वितरित होणार आहे, असे त्यांनी जाहीर केले.
दिवाळीपूर्वीच लाडक्या बहिणींच्या खात्यात रक्कम जमा होणार असल्याने त्यांना आधार मिळणार आहे. १५०० रुपयांची रक्कम त्यांच्या खात्यात जमा होईल. पुढील 2 महिन्यांच्या आत सर्व लाडक्या बहिणींनी E-KYC प्रक्रिया पूर्ण करावी असे आवाहन मंत्री तटकरे यांनी दिले.
अशी करा ई-केवायसी प्रक्रिया
लाभार्थी महिलांनी मोबाईल अथवा संगणकावर ladkibahin.maharashtra.gov.in हे पोर्टल उघडा
लॉगिन केल्यावर ईकेवायसी पॉपअप होईल.त्यावर क्लिक करा
आधार क्रमांक (Aadhaar Number) टाका
कॅप्चा कोड (Captcha Code) टाका
आधार प्रमाणिकरणासाठी मंजूरी द्या. Send OTP या पर्यायावर क्लिक करा
आधारशी लिंक मोबाईल क्रमांकावरील OTP टाका आणि Submit करा
नवीन नियमानुसार पती, वडिलांचा आधार कार्ड क्रमांक, कॅप्चा कोड आणि OTP नमुद करा
आता लाभार्थी लाडक्या बहिणीचा जात प्रवर्ग निवडा
आवश्यक प्रमाणित घोषणापत्रावर (Declaration) क्लिक करा
आता संपूर्ण माहिती एकदा वाचा. सबमिट बटन क्लिक करा.
e-KYC पडताळणी यशस्वीरित्या पूर्ण झाल्याचा मॅसेज दिसेल
