मुंबई (प्रतिनिधी)- नाताळ आणि नववर्ष साजेर करण्यासाठी अन्नपदार्थ विकणाऱ्या बेकरी आणि दुकानांची तपासणी करण्यासाठी राज्याच्या अन्न आणि औषध प्रशासन विभागाच्या (एफडीए) अधिकाऱ्यांकडून मोहीम सुरू करण्यात येणार आहे. हॉटेल्स, केक शॉप्स, फास्टफूड जॉइंट्स आणि भोजनालयांमध्ये दर्जेदार आणि भेसळमुक्त अन्नपदार्थ मिळतात की नाही, याची खात्री करण्यासाठी ही मोहीम सुरू होत असल्याचे अन्न आणि औषध प्रशासन मंत्री नरहरी झिरवाळ यांनी सांगितले.
सणासुदीच्या काळात अशा मोहिमा नियमितपणे राबवल्या जातात, असेही त्यांनी स्पष्ट केले. संबंधित अन्न देणाऱ्या आस्थापनांकडे एफडीएचे विहित परवाने आहेत का, ते या मोहिमेत तपासले जातील. कामगारांच्या वैद्यकीय तपासणीचा अहवाल, अन्न तयार करण्यासाठी वापरल्या जाणाऱ्या पाण्याच्या गुणवत्तेचा अहवाल, आस्थापनाची एकूण स्वच्छता इत्यादींची तपासणीदेखील यावेळी केली जाईल.
याशिवाय, विविध पदार्थ तयार करण्यासाठी वापरल्या जाणाऱ्या पनीर, बटर, चिकन, मटण इत्यादी नाशवंत वस्तूंची गुणवत्तादेखील एफडीएचे अधिकारी या मोहिमेत तपासतील, असेही ते म्हणाले.
मंत्री नरहरी झिरवाळ यांनी, अन्नपदार्थ विकणाऱ्या व्यवसायातील सर्वांना आवाहन केले आहे की, त्यांनी त्यांच्या आस्थापनांमध्ये येणाऱ्या ग्राहकांना दर्जेदार अन्न पुरवावे आणि अन्नसुरक्षांच्या मानकांचे तसेच कायद्याअंतर्गत असलेल्या सर्व मार्गदर्शक तत्त्वांचे पालन करावे.
