उपमुख्यमंत्री तथा राष्ट्रवादी काँग्रेस पार्टीचे प्रमुख अजित पवार आज राष्ट्रवादी परिवार मिलन कार्यक्रमांतर्गत पुण्यात कार्यकर्त्यांच्या घरी जाऊन भेटीगाठी घेत आहेत. लाडक्या नेत्याला भेटल्यानंतर अनेक कार्यकर्ते काही ना काही भेटवस्तू देतात. अनेकदा या भेटवस्तू पाहून नेत्यांनाही काय बोलावं कळत नाही. असाच काहीसा प्रकार आज अजित पवारांबरोबर घडला.यावेळी खडकवासला येथील दत्तनगर परिसरात एका महिलेने अजित पवार यांना चक्क शेतातील ताजी भाजी भेट म्हणून दिली.
या लाडक्या बहिणीने उपमुख्यमंत्र्यांना शेवग्याच्या शेंगा भेट म्हणून दिल्या. या महिला समर्थकाने अजित पवारांना त्यांच्या गाडीजवळच गाठलं. अजित पवार गाडीमधून उतरुन काही पावलं पुढे चालत आल्यानंतर ही महिला पुढे आली. तिच्या हातात एक पिशवी होती ज्यामध्ये शेवग्याच्या शेंगा आणि काही भाज्या होत्या. ती पिशवी या महिलेने अजित पवारांच्या हातात टेकवली.
“ही भाजी तुम्हाला आवडते असं आम्हाला समजलं म्हणून तुमच्यासाठी आणली आहे, ही भाजी घरी न्या आणि शिजवून खा” असंही या महिलेने आग्रहाने अजित पवारांना सांगितलं. तसेच यंदा पाऊस खूप झाला आहे, सगळीकडे ओला दुष्काळ पडलाय, त्यातही ही भाजी आणलीय असं या महिलेने सांगितलं.
महिलेने भाजी दिल्यावर अजित पवार म्हणाले, आता घरी जाऊन बायकोला सांगतो बहिणीने भाजी दिली आहे, आता ही भाजी बनवून मला खाऊ घाल. खडकवासला येथील दत्तनगर परिसरात अजित पवार कार्यकर्त्यांच्या घरी गेले होते. तेथील महिलेने अजित पवार यांना भाजी भेट दिली.
या महिलेने “आम्ही देखील बारामतीचेच आहोत.” असं सांगितल्यावर अजित पवार यांनी या महिलेला विचारलं की “तुमचं गाव कोणतं?” त्यावर महिलेने ‘लाटे’ (बारामती तालुक्यातील गाव) असं सांगितलं. तसेच तिने तिच्या भावाची अजित पवारांशी ओळख करून दिली.
