राज्याचे उपमुख्यमंत्री एकनाथ शिंदे यांनी नुकताच दिल्ली दौरा केला. या दौऱ्यात केंद्रीय गृहमंत्री अमित शाह यांनी एकनाथ शिंदे यांच्याशी आगामी स्थानिक स्वराज्य संस्थांच्या निवडणुकीबाबत चर्चा केल्याची माहिती मिळत आहे. दरम्यान, सामाजिक न्याय मंत्री संजय शिरसाट यांनी स्वतःला आयकर विभागाची नोटीस प्राप्त झाल्याचे जाहीर केले आहे. त्याचबरोबर, शिंदे गटाचे खासदार श्रीकांत शिंदे यांनाही अशाच स्वरूपाची नोटीस मिळाल्याचे शिरसाट यांनी स्पष्ट केले. या घडामोडीनंतर राज्याच्या राजकीय वर्तुळात जोरदार चर्चांना सुरुवात झाली आहे. आता हाच धागा पकडत राष्ट्रवादी काँग्रेस शरद पवार गटाचे आमदार रोहित पवार यांनी एक खळबळजनक दावा केला आहे.
काय म्हणाले रोहित पवार ?
रोहित पवार म्हणाले की, शिंदे कुटुंबात काही लोकांना आयकर विभागाने नोटीस पाठवल्या आहेत. त्यांना नोटीस पाठवल्याने आतल्या आत काही कुरघोड्या होतायत का? यासाठी ते दिल्लीला गेले असावे. बार्गेनिंग पॉवर वाढवण्यासाठी भाजपने हे केलंय का? आयकर नोटीसेसमध्ये माघार घेऊ. मात्र, पालिका निवडणुकीत तडजोड करा. यासाठी भाजपचा हा प्रयत्न असेल, असा दावा त्यांनी केला आहे.
रोहित पवार पुढे म्हणाले की, भाजपच्या अनेक नेत्यांकडे सुद्धा जमिनीचे, आयकर विभागाचे विषय आहेत. त्यांच्याकडे नोटीस जात नाहीत. भाजपचा दुसरा मित्र पक्ष अजित दादांच्या राष्ट्रवादीच्या नेत्यांकडे आयकर विभागाची नोटीस जात नाही. पण, एकनाथ शिंदे यांच्याकडे जाते. मुंबई महापालिका निवडणुकीत एकनाथ शिंदे यांची ताकद कुठेतरी कमी करण्याचा प्रयत्न भाजपकडून होत आहे हे चित्र आपल्या सगळ्यांना बघायला मिळत असल्याचे त्यांनी म्हटले. आता रोहित पवार यांच्या वक्तव्यावर भाजप काय पलटवार करणार? हे पाहणे महत्त्वाचे ठरणार आहे.
