पुण्याच्या दौंड तालुक्यातील केडगावमध्ये नवरा-बायकोच्या भांडणातून एक हृदयद्रावक घटना घडली आहे. नवरा-बायकोमधील भांडणात ११ महिन्यांच्या मुलाचा मृत्यू झाला. बायकोने नवऱ्याला फेकून मारलेला त्रिशूल हा तिथे असलेल्या चिमुकल्याला लागला आणि त्याचा दुर्दैवी मृत्यू झाला. याप्रकरणी गुन्हा नोंदण्यात आला.
याबाबत मिळालेल्या माहितीनुसार , अवधूत मेंगवडे असं मृत चिमुकल्याचं नाव आहे. नितीन मेंगवडे हे केडगाव येथे राहतात. त्यांचे आणि त्यांच्या पत्नीचे क्षुल्लक कारणावरून भांडण झाले. हे भांडण इतके विकोपाला गेले की, भांडणा दरम्यान बायकोने नवऱ्याला शेजारी असलेला त्रिशूल फेकून मारला. पण तो त्रिशूल बाजूला भावजयेच्या कडेवर असलेल्या मुलाला लागला. हा त्रिशूळ लागल्याने अवधूत गंभीर जखमी झाला.
जखमी अवधूतला रुग्णालयात दाखल करण्यात आले. पण उपचारादरम्यान त्याचा मृत्यू झाला.
नवरा-बायकोच्या भांडणात निष्पाप मुलाचा जीव गेल्यानं परिसरात हळहळ व्यक्त केली जातेय.
घटनेची माहिती मिळताच पोलीस घटनास्थळी पोहोचले. याप्रकरणी यवत पोलीस ठाण्यात गुन्हा दाखल करण्यात आला. तसेच भाग्यश्री मेंगवड यांनी दिलेल्या तक्रारीनुसार नितीन मेंगवडे आणि पल्लवी मेंगवडे यांच्या ताब्यात घेतलं. या प्रकरणाचा पुढील तपास पोलीस करत आहे.
