दैनिक भ्रमर : प्रेमाचा शेवट सैराट चित्रपटासारखा झाल्याच्या अनेक घटना घडल्या आहेत, त्या अजूनही घडत आहे. गुजरात मधील बनासकांठा जिल्ह्यात एक देखील अशीच धक्कदायक घटना उघडकीस आली आहे. येथील एका १८ वर्षीय चंद्रिका चौधरी हिचा प्रेमसंबंधामुळे खून तिच्याच वडील सेधाभाई आणि काका शिवाभाई पटेल यांनी केल्याचा आरोप आहे. चंद्रिकेच्या वडिलांचा शोध सुरू असून दोन्ही काकांना अटक करण्यात आली आहे, अशी माहिती सहाय्यक पोलिस अधीक्षक सुमन नाला यांनी दिली.
चंद्रिका आणि हरेश चौधरी दोघांचंही एकमेकांवर खूप प्रेम. पण कुटुंबाचा या प्रेमाला विरोध होता. यामुळे ती कायम भीतीच्या वातावरणात राहत होती. याबाबत चंद्रिकेने हरेशला सांगत आपला जीव धोक्यात असल्याची भीती व्यक्त केली होती. २४ जून रोजी रात्री उशिरा तिने हरेशला इन्स्टाग्रामवर मेसेज पाठवला, “मला घेऊन चल, नाहीतर माझं कुटुंब माझ्या इच्छेविरुद्ध माझं दुसरीकडे लग्न लावून देईल. जर मी लग्नाला तयार झाले नाही, तर ते मला मारुन टाकतील. मला वाचव.”
धक्कादायक म्हणजे मेसेजनंतर काही तासांनी चंद्रिकेचा मृतदेह तिच्या घरात आढळला, तिच्या अंत्यसंस्काराची घाईघाईत व्यवस्था करून नातेवाईकांनाही, त्यात पालनपूरमध्ये शिकणाऱ्या भावालाही, बोलावले नाही. त्यामुळे तिचा प्रियकर हरेशला हा प्रकार संशयास्पद वाटला. त्याने पोलिसांत तक्रार दाखल केली आणि मृत्यूची चौकशी करण्याची मागणी केली. त्यापूर्वीच, चंद्रिकाला कुटुंब ठार मारू शकतं, या भीतीने त्याने न्यायालयात याचिका दाखल केली होती, पण सुनावणीच्या तारखेआधीच तिचा मृत्यू झाला होता.
पोलिसांच्या मते, चंद्रिकाच्या कुटुंबाने तिच्या हत्येची योजना आखली, तिला पहिल्यांदा दूधात औषध देऊन तिला बेशुद्ध केलं, नंतर गळा दाबून हत्या केली, आत्महत्येसारखा आभास निर्माण करण्यासाठी मृतदेह फासावर लटकवले. तांत्रिक पुरावे, परिस्थितीजन्य तथ्ये आणि विरोधाभासी जबाब यांच्या आधारे हा खून पूर्वनियोजित असल्याचं पोलिसांनी निष्कर्ष काढला. थरड पोलिस ठाण्यात खुनाचा गुन्हा दाखल करून दोघा काकांना अटक करण्यात आली असून, वडिलांचा शोध सुरू आहे.
