नाशिकरोड (भ्रमर प्रतिनिधी ): पिंपळगाव खांब येथे तिसरा बिबट्या महानगरपालिकेच्या जलशुद्धीकरण केंद्र जवळ लावलेल्या पिंजऱ्यात जेरबंद झाला. या भागात वन विभागाने तब्बल 15 पिंजरे या दोन ते तीन किलोमीटर परिघातात लावले असून त्यातील एका पिंजऱ्यात बिबट्या अडकला.
रक्षाबंधनाच्या पूर्वसंध्येला वडनेर दुमाल्यातील साडेतीन वर्षांचा आयुष भगत याला दारातून बिबट्याने उचलून नेऊन त्याची हत्या केली होती. या घटनेने संपूर्ण शहर व जिल्हा हादरला होता. संतप्त ग्रामस्थ, स्थानिक लोकप्रतिनिधी यांनी वन विभागाच्या कार्यालयावर मोर्चा काढत तातडीने बिबट्याला जेरबंद करण्याची मागणी केली होती.
वन विभागाने या परिसरात बिबट्यांचा शोध घेण्यासाठी अत्याधुनिक साधनांसह १५ पिंजरे उभारले. आठ दिवसांपूर्वी दोन बिबट पकडण्यात आले होते. महालक्ष्मी नगर मळे परिसर पिंपळगाव खांब आणि भवानी नगर मळे परिसर पिंपळगाव खांब या ठिकाणी यापूर्वी बिबट्या जेरबंद करण्यात आले होते. मात्र अजूनही अनेक बिबटे या भागात फिरत असल्याची भीती ग्रामस्थ व माजी नगरसेवक केशव पोरजे, जगदीश पवार यांनी व्यक्त केली होती.
दरम्यान, मंगळवारी सकाळी बिबट्या पिंजऱ्यात अडकलेला निदर्शनास आल्यानंतर ग्रामस्थांनी तात्काळ वन विभागाशी संपर्क साधला. पकडलेल्या बिबट्याला सुरक्षितरीत्या म्हसरूळ येथे हलविण्यात आले. या भागात अजून किती बिबटे आहेत आणि हल्लेखोर बिबट्या हाच का, याबाबत अद्याप प्रश्नचिन्ह कायम आहे.
