आपल्या सोबत असलेल्या मैत्रिणीची छेड काढल्याच्या संशयावरून एका विधी संघर्षित बालकाने एका भिकाऱ्याच्या डोक्यात दगड घालून त्याची हत्या केल्याची खळबळजनक घटना ठक्कर बाजार जवळ घडली आहे.
याबाबत पोलीस सूत्रांकडून मिळालेली अधिक माहिती अशी की, एक विधीसंघर्षित बालक आपल्या मैत्रिणी सोबत ठक्कर बजार जवळील एका हॉटेल जवळ उभा होता. त्यावेळी ती पाण्याची बाटली आणण्यासाठी गेली असता तिथे एक भिकारी बसलेला होता. त्याने या मुलीची छेड काढण्याचा संशय त्या विधीसंघर्षित बालकाला आल्याने त्याने रागाच्या भरात त्याच्या डोक्यात दगड टाकला.
या घटनेत त्या भिकाऱ्याचा जागीच मृत्यू झाला. घटना घडल्यापासून काही वेळातच गुन्हे शाखा युनिट एक चे वरिष्ठ पोलीस निरीक्षक मधुकर कड यांच्या मार्गदर्शनाखाली गुन्हे शाखा युनिट एकच्या पथकाने त्या विधी संघर्ष बालकाला त्वरित ताब्यात घेतले. सरकार वाडा पोलीस घटनास्थळी दाखल झाले आहेत.
