नाशिक (भ्रमर प्रतिनिधी) :- मनी लॉण्डरिंगमध्ये सहभागी असल्याप्रकरणी सीबीआयमध्ये गुन्हे दाखल करण्यात आल्याचे भासवून ईडीद्वारे अटक करण्याची भीती दाखवून नाशिकच्या एका इसमाला 30 लाख रुपयांचा ऑनलाईन गंडा घातल्याचा प्रकार उघडकीस आला आहे.
याबाबत पोलिसांनी दिलेली माहिती अशी, की फिर्यादी हे घरी असताना त्यांना एका अज्ञात इसमाने मोबाईल फोन आणि व्हॉट्सअ‍ॅपद्वारे संपर्क साधून फिर्यादी यांच्या आधारकार्डावरून मोबाईलचे सिमकार्ड खरेदी करून त्याद्वारे इतरांना अश्‍लील मेसेज, अश्‍लील व्हिडिओ पाठविले जात आहेत, असे भासविले. फिर्यादी यांना मनी लॉण्डरिंगमध्ये सहभागी असल्याचे सांगून सीबीआयमध्ये गुन्हे दाखल करण्यात आले आहेत, असे सांगून सीबीआयचा खोटा सेट व पोलीस अधिकार्‍याचा पोशाख घालून पोलीस असल्याचे व्हॉट्सअ‍ॅपद्वारे दाखविले.
त्याचप्रमाणे सुप्रीम कोर्टाचा खोटा सेट व सरन्यायाधीशांसारखा पोशाख घालून सुप्रीम कोर्टाचे नाव व लोगो असलेली खोटी कोर्ट ऑर्डर फिर्यादीला व्हॉट्सअ‍ॅपद्वारे पाठविली, तसेच फिर्यादीला सीबीआयद्वारे, ईडीद्वारे अटक करण्याची भीती दाखवून फिर्यादीला डिजिटल अरेस्ट करून त्यांची 30 लाख रुपयांची फसवणूक केली.
हा प्रकार दि. 17 ते 26 नोव्हेंबर यादरम्यान ऑनलाईन पद्धतीने घडला. या प्रकरणी सायबर पोलीस ठाण्यात अज्ञात इसमाविरुद्ध गुन्हा दाखल करण्यात आला असून, पुढील तपास वरिष्ठ पोलीस निरीक्षक पिसे करीत आहेत.
