गेल्या काही दिवसांपासून आंतरराष्ट्रीय स्तरावर भारत आणि कॅनडामध्ये वाद सुरु असतानाच अशातच आणखीन एका खलिस्तानी दहशतवाद्याची कॅनडात हत्या करण्यात आली आहे. भारतातून पळून गेलेल्या या गँगस्टर सुखदूल सिंग ऊर्फ सुक्खा दुनेके याची कॅनडामधील पिनिपेग येथे अज्ञात लोकांनी गोळ्या झाडून हत्या केली. पंजाबमधून पलायन करून कॅनडामध्ये बसलेला A कॅटेगरीचा गँगस्टर सुखदुल सिंह उर्फ सुक्खा दुनुके याची कॅनडात गोळ्या झाडून हत्या करण्यात आली आहे.
याबाबत मिळालेल्या माहितीनुसार, आरोपी सुक्खा हा खलिस्तानी दहशतवादी अर्शदीप सिंह उर्फ अर्श दलाचा राईट हँड होता. एनआयएच्या वॉन्टेड यादीतही त्याचा समावेश होता. सुक्खा कॅनडामध्ये बसून भारतातील आपल्या गँगच्या गुडांमार्फत अपहरण आणि खंडणी उकळण्याचं काम करायचा.
सुखदुल सिंह उर्फ सुक्खा दुनेके यानं 2017 मध्ये बनावट कागदपत्रांच्या आधारे पासपोर्ट आणि पोलीस क्लिअरन्स सर्टिफिकेट मिळवून कॅनडाला पळून जाण्याचा प्रयत्न केला होता.
याप्रकरणी त्याच्यावर सात गुन्हे दाखल करण्यात आले होते. पोलिसांशी संगनमत करून त्याने कॅनडाचा व्हिसा मिळवला होता, याप्रकरणीही दुनेके यांच्यावर गुन्हा दाखल करण्यात आला होता. पंजाब पोलिसांच्या दोन कर्मचाऱ्यांवर त्याला मदत केल्याचा आरोप होता, त्यांनंतर त्या पोलिसांना मोगा पोलिसांनी अटक केली होती.
यावर्षी मार्चमध्ये खलिस्तानी दहशतवादी हरदीपसिंह निज्जर यांची कॅनडात गोळ्या घालून हत्या करण्यात आली होती. सरे येथील गुरुद्वाराच्या पार्किंगजवळ दोन अज्ञात बंदूकधाऱ्यांनी निज्जरवर गोळ्या झाडल्या. त्याच्या हत्येनंतर खलिस्तानी समर्थकांनी कॅनडा, लंडन आणि अमेरिकेसह अनेक ठिकाणी निदर्शनं केली आणि भारतविरोधी घोषणा दिल्या आणि निज्जरच्या हत्येसाठी भारताला जबाबदार धरले होते. खलिस्तानसाठी सार्वमत घडवण्याचा प्रयत्न करणाऱ्या गटात हरदीपसिंह निज्जरचं नाव मोठं होतं. तो पंजाबमधील जालंधर जिल्ह्यातील भरसिंहपूर गावचा रहिवासी होता. हरदीपसिंह निज्जरला भारताच्या सुरक्षा यंत्रणांनी फरारी आणि दहशतवादी घोषित केलं होतं. याशिवाय राष्ट्रीय तपास यंत्रणेनं निज्जरवर 10 लाख रुपयांचं बक्षीस जाहीर केलं होतं.
