छत्रपती संभाजी नगरमधून अपघाताची एक दुर्दैवी घटना समोर आली आहे. या भीषण अपंघातामध्ये एकाच कुटुंबातील चौघांचा दुर्देवी मृत्यू झाला आहे. मृतांमध्ये 6 महिन्यांच्या बाळाचाही समावेश आहे. दहा वर्षांनंतर झालेल्या बाळाचे बारसे आटोपून पुण्याला जाणाऱ्या कुटुंबाच्या कारला दारू पिऊन गाडी चालवणाऱ्या तरुणांच्या स्कॉर्पिओने जोरदार धडक दिल्याने हा अपघात झाल्याची माहिती समोर येत आहे.
याबाबत मिळालेल्या माहितीनुसार, छत्रपती संभाजीनगर शहरापासून जवळच असलेल्या नगर रोडवरील लिंबेजळगाव परिसरात असलेल्या टोलनाक्याजवळ हा भीषण अपघात घडला आहे. दारू पिऊन भरधाव वेगात स्कॉर्पिओ चालवणाऱ्या दोन तरुणांनी दुभाजक ओलांडून पलीकडे जाणाऱ्या क्विड कारला जोरदार धडक दिली. याच क्विड कारमधून अमरावती येथील अभियंते अजय देसरकर आपल्या कुटुंबासहीत पुण्याला जात होते त्यावेळेस हा अपघात घडला.
दुभाजक ओलांडून समोरुन आलेल्या स्कॉर्पिओने या क्विड कारला दिलेली धडक एवढी जोरदार होती की या छोट्या कारचा चेंदामेंदा झाला. अपघाताची दाहकता कारची अवस्था पाहूनच समजते. क्विडच्या तुलनेत स्कॉर्पिओला कमी नुकसान झालं असून गाडीची बांधणी दणकट असल्याने कारमधील तरुणांना केवळ दुखापत झाल्याचे समजते.
दरम्यान या अपघातात मृणालिनी अजय बेसरकर (38), आशालता पोपळघोटे (65), दुर्गा सागर गिते (7) आणि सहा महिन्यांच्या बाळाचा मृतांमध्ये समावेश आहे. या अपघातात 40 वर्षीय अजय अंबादास बेसरफर आणि 35 वर्षीय शुभांगीनी सागर गिले जखमी झाल्या आहेत. या प्रकरणामध्ये मद्यपान करुन कार चालवणाऱ्या स्कॉर्पिओमधील दोन्ही तरुणांविरुद्ध सदोष मनुष्य वधाचा गुन्हा दाखल करण्यात आला आहे.
