लासलगाव: लासलगाव शहरातील कोटमगाव रस्त्यावरील शिवकमल मंगल कार्यालयासमोर असलेल्या संपूर्ण टपरी मार्केटला काल रात्री अचानक आग लागल्याने टपरी मार्केट मधील सर्व टपरी धारक व्यापाऱ्यांचे मोठे नुकसान झाल्याची घटना घडली.
याबाबत अधिक माहिती अशी की, काल रात्री दहा वाजेच्या सुमारास लासलगाव शहरातील कोटमगाव रस्त्यावरील शिवकमल मंगल कार्यालयासमोर असलेल्या संपूर्ण टपरी मार्केटला आग लागली. या आगीने सर्वच्या सर्व टपरी धारकांचे मोठे नुकसान झाले आहे. आग लागण्याचे कारण अद्याप स्पष्ट झालेले नाही. ही घटना समजताच आजूबाजूतील व परिसरातील नागरिकांनी घटनास्थळी धाव घेऊन मिळेल त्याठिकाणाहून पाणी उपलब्ध करून आग आटोक्यात आणण्याचा प्रयत्न केला. पिंपळगाव बसवंत व चांदवड येथील अग्निशामक दलाची गाडी दाखल होऊन आग नियंत्रणात आणली. घटना घडताच लासलगाव पोलिस घटनास्थळी तातडीने दाखल झाले.
या घटनेची प्रशासनाने तातडीने दखल घेऊन पंचनामा करून या सर्व टपरी धारकांना नुकसान भरपाई देण्यात यावी तसेच स्थानिक प्रशासनाने तातडीने अग्निशामक गाडीची व्यवस्था करावी अशी मागणी नागरिकांनी केली आहे.लासलगाव व परिसरासाठी अग्निशामक गाडीची मागणी बाजार समिती कडे करणार असल्याचे सरपंच जयदत्त होळकर यांनी सांगितले.
