महाराष्ट्र राज्य कुस्तीगीर संघातर्फे रोहित पवारांना सात दिवसांचा अल्टिमेटम देण्यात आला असल्याची माहिती आहे. राज्यस्तरीय अजिंक्यपद महाराष्ट्र केसरी कुस्ती स्पर्धा अहिल्यानगर येथे 26 ते 30 मार्च रोजी आयोजित करण्यासंदर्भात आमदार रोहित पवार यांनी पत्रकार परिषद घेऊन जाहीर केलं आहे. त्यावर आता महाराष्ट्र राज्य कुस्तीगीर संघातर्फे आक्षेप नोंदवला अन् आमदार रोहित पवार यांना अल्टिमेटम देखील दिला आहे.
तसेच, वास्तविक आजपर्यंत झालेल्या वरीष्ठ राज्य अजिंक्यपद महाराष्ट्र केसरी कुस्ती स्पर्धेतील प्राविण्यधारक कुस्तीगीरास खास सवलतींचा दरवर्षी लाभ मिळत आहे. त्या सवलती रोहित पवार कुस्तीपट्टूंना देणार का? असा सवाल महाराष्ट्र राज्य कुस्तीगीर संघाने विचारला आहे. रोहित पवारांनी खुलासा करावा अन्यथा गुन्हा दाखल करण्यात येईल, असा इशारा महाराष्ट्र राज्य कुस्तीगीर संघाने दिला आहे.
रोहित पवार आयोजित करत असलेल्या 66 व्या गादी/माती राज्यस्तरीय अजिंक्यपद कुस्ती स्पर्धा व महाराष्ट्र केसरी कीताब लढत या स्पर्धेतुन सहभागी व प्राविण्यधारक कुस्तीगीरांना वरील लाभ होतील असं पुढील 7 दिवसामध्ये रोहित पवार यांनी पत्रकार परिषद घेऊन जाहीर करणं आवश्यक आहे, असं म्हणत महाराष्ट्र राज्य कुस्तीगीर संघाचे कार्याध्यक्ष संदीप उत्तमराव भोंडवे यांनी अल्टिमेटम दिलाय.
शासकीय नोकरीत आरक्षण, विद्यार्थांना गुणसवलत , शिवछत्रपती पुरस्कार मानांकन सर्व या स्पर्धेतील प्राविण्यधारक कुस्तीगीरांना लाभ मिळत आहे . त्यामुळे एकसारख्या नावाच्या कुस्ती स्पर्धा आयोजित करुन महाराष्ट्रातील कुस्तीगीरांची फसवणूक होऊ नये, म्हणून महाराष्ट्र राज्य कुस्तीगीर संघाने हे पाऊल उचललं आहे, असंही संदीप उत्तमराव भोंडवे यांनी म्हटलं आहे.
महाराष्ट्र केसरी स्पर्धेतील कुस्तीगीरास राष्ट्रीय अजिंक्यपद स्पर्धेत सहभागाची संधी प्राप्त होते. या स्पर्धेतील प्राविण्यधारक कुस्तीगीरास शासकीय मानधन प्राप्त होते. या स्पर्धेतील प्रशस्तीपत्रके शासकीय नोकरी व विद्यार्थ्यांना गुणसवलत या करीता ग्राह्य धरली जातात. या स्पर्धेतील प्रशस्तीपत्रके शिवछत्रपती पुरस्कारासाठी ग्राह्य धरली जातात. या स्पर्धेतील विजेते कुस्तीगीर शासकीय स्व. खाशाबा जाधव चषक कुस्ती स्पर्धेत सहभागी होण्याची संधी प्राप्त होते, या सर्व गोष्टींचा लाभ कुस्तीगीरांना मिळणार का? असा सवाल महाराष्ट्र राज्य कुस्तीगीर संघातर्फे विचारण्यात आला आहे.
