राष्ट्रवादी अजित पवार गटाचे आमदार आणि राज्याचे कृषिमंत्री माणिकराव कोकाटे व त्यांचे बंधू विजय कोकाटे यांनी मुख्यमंत्री कोट्यातून दिल्या जाणाऱ्या सदनिका या बनावट दस्तऐवज तयार करून लाटल्या प्रकरणात प्रत्येकी दोन वर्षांचा कारावास आणि ५० हजार रुपये दंडाची शिक्षा नाशिक जिल्हा न्यायालयाने ठोठावली होती. दरम्यान, माणिकराव कोकाटे यांना मोठा दिलासा मिळाला आहे. माणिकराव कोकाटे यांच्या शिक्षेला स्थगिती देण्यात आली आहे. नाशिक सत्र न्यायालयाकडून ही स्थगिती देण्यात आली आहे.
नाशिक जिल्हा सत्र न्यायालयाने मुख्यमंत्री कोट्यातून दिल्या जाणाऱ्या सदनिका लाटल्या प्रकरणात कृषीमंत्री माणिकराव कोकाटे आणि त्यांचे बंधू विजय कोकाटे यांना १ लाखांच्या जातमुचलक्यावर जामीन मंजूर केला आहे. तसेच त्यांच्या दोन वर्षांच्या शिक्षेला अपीलावरची कारवाई सुरु असेपर्यंत तात्पुरती स्थगिती देण्यात आल्याची माहिती माणिकराव कोकाटे यांचे वकील अविनाश भिडे यांनी माध्यमांशी बोलतांना दिली आहे.
