तृणमूल काँग्रेसच्या खासदार महुआ मोईत्रा या प्रसिद्ध अशा खासदार आहेत. त्यांनी संसदेत केलेल्या प्रत्येक भाषणाची सगळीकडे चर्चा असते. विशेष म्हणजे भाजपा आणि पंतप्रधान नरेंद्र मोदी यांच्यावर त्या सडकून टीका करताना दिसतात. याच महुआ मोईत्रा यांच्याबाबत एक मोठी बातमी समोर येत आहे. त्यांनी ओडिशा राज्यातील एका बड्या नेत्याशी लग्न केलंय.
मिळालेल्या माहितीनुसार , महुआ मोईत्रा दुसऱ्यांदा लग्नबंधनात अडकल्या आहेत. त्यांनी बिजू जनता दल (बीजेडी) पक्षाचे नेते पिनाकी मिश्रा यांच्याशी लग्न केलं आहे. पिनाकी मिश्रा हे राजकारणात चांगलेच सक्रीय असून त्यांचे ओडिशा राज्यात मोठे नाव आहे. या दोघांनीही जर्मनीत विवाह केला आहे. दोन वेळा खासदार राहिलेल्या मोईत्रा आणि पिनाकी मिश्रा यांचे 30 मे रोजी लग्न झाले आहे.
पिनाकी मिश्रा हे ओडिशा राज्यातील पुरी येथून खासदार राहिलेले आहेत. 2024 सालची लोकसभा निवडणूकही त्यांनी लढवली होती. मात्र त्यांना भाजपाचे संबित पात्रा यांनी पराभूत केले होते.
महुआ मोईत्रा यांचे हे दुसरे लग्न आहे. आआधी त्यांनी डॅनिश फायनान्सर लार्स ब्रोरसन यांच्याशी लग्न केलं होतं. पुढे या दोघांनी रितसर घटस्फोट घेतला होता. महुआ मोईत्रा यांनी तृणमूल काँग्रेसच्या तिकिटावर 2024 सालची लोकसभा निवडणूक लढवली होती. त्या पश्चिम बंगालमधील कृष्णानगर मतदारसंघाच्या खासदार आहेत.
2009 साली केला राजकारणात प्रवेश
खासदार होण्याआधी महुआ मोईत्रा या आमदारर होत्या त्यांनी 2016 ते 2019 या काळात करीमपूर या विधानसभा मतदारसंघाचे प्रतिनिधीत्त्व केलेले आहे. महुआ मोईत्रा यांचा जन्म 12 ऑक्टोबर 1974 रोजी झाला. त्या एक अर्थशास्त्री आहेत. त्यांनी अमेरिकेतून शिक्षण घेतलेले आहे. 1998 साली त्यांनी मॅसॅच्युसेट्समधील माउंट होल्योक कॉलेज साउथ हॅडली येथून अर्थशास्त्र आणि गणितात पदवी मिळवलेली आहे. 2009 साली राजकारणात प्रवेश केला.
