25 हजार रुपयांची लाच घेताना तलाठ्यासह तीन जणांना लाचलुचपत प्रतिबंधक विभागाने रंगेहाथ पकडले आहे.
मोमीन दिलशाद अब्दुल रहीम (वय 29, तलाठी, तहसील कार्यालय चाळीसगाव, जिल्हा जळगाव. रा. प्लॉट नंबर 9, हरी ओम नगर, राणी पार्क हॉटेलचे मागे, रावसाहेब वाघ यांचे घरात, चाळीसगाव, जिल्हा जळगाव), वडिलाल रोहिदास पवार (वय 40, रोजगार सेवक, रा. मु.पो. लोंजे, ता. चाळीसगाव, जिल्हा जळगाव) व दादा बाबू जाधव (वय 40, व्यवसाय शेती, रा. मु.पो. लोंजे, ता. चाळीसगाव, जि. जळगाव) अशी लाच घेणाऱ्यांची नावे आहेत.
याबाबत अधिक माहिती अशी की, तक्रारदार यांचे वडील व इतर सात यांचे मौजे पाथरजे तालुका चाळीसगाव येथे वडिलोपार्जित शेत जमिनीच्या 7/12 उताऱ्यावरील ईतर हक्कातील जुनी कालबाह्य नोंद कमी होणेकरिता त्यांच्या वडिलांनी केलेला अर्ज घेऊन मोमीन दिलशाद अब्दुल रहीम यांची त्यांच्या कार्यालयात जावून भेट घेतली. त्यावेळी त्यांनी वडिलाल पवार यांना भेटण्यास सांगून त्यांनी सांगितल्याप्रमाणे पैसे दिल्यावर तुमचे काम करून देते अशी तक्रार दि. 3.7.2025 रोजी दिली होती.
या तक्रारीची दि. 3.7.2025 रोजी पडताळणी केली असता मोमीन दिलशाद अब्दुल रहीम यांनी तक्रारदार यांना त्यांचे कामाबाबत पवार यांस भेटण्यास सांगितले. त्याप्रमाणे तक्रारदार यांनी पवार यांचे सह मोमीन दिलशाद अब्दुल रहीम यांची भेट घेतली तेव्हा त्यांनी मोमीन दिलशाद अब्दुल रहीम यांनी जसा वाटणीपत्राप्रमाणे खर्च येईल असे सांगितले.
त्यानंतर दि.14.07.2025 रोजी तक्रारदार यांनी पवार यांचेसह पुन्हा मोमीन दिलशाद अब्दुल रहीम यांची भेट घेतली असता मोमीन दिलशाद अब्दुल रहीम यांनी त्यांना तक्रारदार यांच्या कामाबाबत उद्या सांगते व पवार यांचेशी बोलते असे सांगितले.
त्यानंतर दि. 17.7.2025 रोजी तक्रारदार यांनी पवार यांची भेट घेतली असता त्यांनी तक्रारदार यांना मोमीन दिलशाद अब्दुल रहीम यांनी तक्रारदार त्यांचे काम करून देण्याच्या मोबदल्यात 25,000 रुपये घेणेबाबत सांगितले. त्यावेळी पवार यांच्यासोबत असलेले दादा जाधव यांनी तक्रारदार यांना लाच देण्यासाठी अपप्रेरणा देऊन प्रोत्साहित केले.
त्यानंतर दि.30.7.2025 रोजी सापळा कारवाई दरम्यान पवार यांनी मोमीन दिलशाद अब्दुल रहीम यांचे चाळीसगाव येथील कार्यालयाबाहेर तक्रारदार यांच्याकडून 25,000 रुपये लाचेची रक्कम स्वतः स्वीकारताना त्यांना रंगेहाथ पकडण्यात येऊन तिघांविरुद्ध चाळीसगाव शहर ठाण्यात गुन्हा दाखल करण्यात आला आहे.
आरोपीतांचे 3 मोबाईल ताब्यात घेण्यात आले असून पुढील निरीक्षण करून तपास करण्याची तजवीज ठेवली आहे.
