दैनिक भ्रमर : १५ ऑगस्टला स्वातंत्र्यदिनी झेंडा कोण फडकवणार यामुळे राज्यात वातावरण पेटलेले आहे. नाशिक आणि रायगड या दोन जिल्हांना अद्याप पालकमंत्री न मिळाल्याने झेंडा फडकवण्याचा पालकमंत्र्यांना असणारा मान कोणाला मिळणार याकडे इच्छुकांचे डोळे लागून होते. मंगळवारी अखेर ही प्रतीक्षा संपली. त्यामुळे नाशिकला गिरीश महाजन तर रायगडला अदिती तटकरे झेंडावंदन करणार असल्याचे निश्चित झाले त्यामुळे इच्छुकांचा हिरमोड झाला.
याच नाराजीनाट्यात छगन भुजबळ यांना गोंदिया येथे झेंडावंदनाची जबाबदारी देण्यात आली मात्र तब्येतीच्या कारणास्तव त्यांनी ती नाकारली. झेंडावंदनास गोंदियाचे पालकमंत्री बाबासाहेब पाटील यांना गुडघ्याच्या ऑपरेशनमुळे हालचाल करणे शक्य नसल्याने त्यांची उपस्थिती शक्य नव्हती. त्यामुळे गोंदियात छगन भुजबळ यांना ही जबाबदारी देण्यात आली मात्र आता तब्येतीच्या कारणास्तव भुजबळ यांनी ध्वजारोहणास नकार दिल्याने आता गोंदियाची जबाबदारी मंगलप्रभात लोढा यांच्याकडे देण्यात आली आहे. झेंडावंदनास नकार दिल्याने छगन भुजबळ नाराज असल्याच्या चर्चा सुरु झाल्या आहेत.
