मुंबईतल्या कोस्टल रोडवर आज सकाळी एका कारला अचानक आग लागली. अचानक झालेल्या घटनेने परिसरात भीतीचे वातावरण पसरले. या घटनेचा व्हिडीओ सोशल मीडियावर व्हायरल झाला. दरम्यान आगीमुळे मोठी वाहतूक कोंडी झाली होती. सकाळी सुमारे 9.30 वाजता दक्षिणेकडील (साऊथबाउंड) टनेलमध्ये ही घटना घडली.
मुंबई ट्रॅफिक पोलिसांनी सोशल मीडियावर माहिती देत सांगितले की, कोस्टल रोड टनेलमधून उत्तर मुंबईहून दक्षिण मुंबईकडे जाणारी वाहतूक तात्पुरती थांबवण्यात आली आहे.आगीचे मोठमोठे ज्वाळा बाहेर येत होत्या तर धूर संपूर्ण टनेलमध्ये पसरल्याचे यावेळी पाहायला मिळालं. सुदैवाने या घटनेत कोणतीही जीवितहानी झालेली नाही.
हे दृश्य पाहून प्रवाशांमध्ये घबराट पसरली. टनेलमधून जाणाऱ्या एका वाहनातून हे व्हिडिओ रेकॉर्ड करण्यात आले असल्याचे समजते.या घटनेनंतर वाहतूक हाजी अली आणि वरळी कनेक्टरकडे वळवण्यात आली. जवळपास अर्धा तास वाहतूक ठप्प होती. मात्र, परिस्थिती नियंत्रणात आल्यानंतर ट्रॅफिक पोलिसांनी पुन्हा वाहनांची हालचाल सुरळीत केली.
