बदलापूरमध्ये शिंदे गटाचे शहराध्यक्ष वामन म्हात्रे यांच्या कुटुंबातील तब्बल सहा जणांना एकाचवेळी उमेदवारी मिळाल्यानंतर घराणेशाहीचा मुद्दा ऐरणीवर आलाय. या मुद्द्यावरून शिवसेना शिंदे गटावर विरोधकांनी जोरदार टीकास्त्र डागले. आता, कल्याण-डोंबिवलीसह अन्यत्र त्याची पुनरावृत्ती नको, याची काळजी उपमुख्यमंत्री एकनाथ शिंदे यांच्या शिवसेनेने आणि भाजपने मोठा निर्णय घेतल्याची माहिती समोर येत आहे.
बदलापूरमध्ये वामन म्हात्रे, त्यांची पत्नी, भाऊ तुकाराम म्हात्रे, भावजय उषा म्हात्रे, मुलगा वरुण आणि पुतण्या भावेश अशा सहा नातेवाईकांना तिकीट देण्यात आले. 2015 मध्येही त्यांच्या घरातील चार जणांना उमेदवारी मिळाली होती. यामुळे या वर्षी मिळालेल्या सहा तिकिटांनी राजकीय वातावरण ढवळून निघाले. अनेकांनी उघडपणे घराणेशाहीचा आरोप करत शिंदेसेनेवर टीकास्त्र सोडले.
आता एकाच घरात केवळ दोघांना उमेदवारी देण्याचा निर्णय घेण्यात आल्याचे समजते. त्यामुळे स्वतः, पत्नी, मुलगा, सून, जावई अशा गोतावळ्याला उमेदवारीची खिरापत मिळेल याकरिता एका पक्षातून दुसऱ्या पक्षात उड्या मारलेल्या आणि आता उड्या मारण्याच्या बेतात असणाऱ्यांची चांगलीच अडचण होणार आहे.
