नवीन नाशिक (भ्रमर प्रतिनिधी) - कंपनीमध्ये अवैध बांधकाम केल्याची तक्रार मागे घेण्याच्या मोबदल्यात व कंपनी चालू ठेवण्यासाठी मालकाकडे ६० लाख रुपयांची खंडणी मागून दीड लाखाची खंडणी स्वीकारणार्‍या चार जणांविरुद्ध गुन्हा दाखल करण्यात आला आहे.
पोलिसांकडून मिळालेल्या माहितीनुसार, फिर्यादी राजेंद्र धोंडू कोठावदे (रा. खुटवडनगर, नाशिक) यांची कंपनी आहे. आरोपी संतोष प्यारेलाल शर्मा (रा. देवळाली कॅम्प) याने सातपूर एमआयडीसी कार्यालयातील अधिकार्‍यांशी संगनमत करून फिर्यादीच्या कंपनीमध्ये अवैध बांधकाम केल्याची खोटी तक्रार एमआयडीसी कार्यालयात केली होती.
ही तक्रार मागे घेण्याच्या मोबदल्यात तसेच कंपनी चालू ठेवण्याकरिता दरमहा हप्ता द्यावा लागेल, नाही तर मारून टाकीन, अशी धमकी शर्मा याने फिर्यादी कोठावदे यांनी दिली, तसेच फिर्यादीची जनमानसातील प्रतिमा मलिन व्हावी याकरिता सोशल मीडियावर फिर्यादीच्या नावाचा व्हिडिओ अपलोड करून त्यांची बदनामी केली.
तसेच आरोपी शर्मा याच्यासह त्याचे साथीदार शशीभाऊ राजपूत, रोहितभाऊ म्हस्के व कैलासभाऊ दवंडे यांनी फिर्यादीच्या कंपनीच्या गेटवर विनापरवाना अनधिकृत पोस्टर लावून कंपनी बंद पाडतो, तुमचा माज जिरवतो, कंपनी चालू ठेवायची असेल, तर आम्हाला हप्ता द्यावा लागेल, अशी धमकी देऊन धक्काबुक्की करून कामगारांमध्ये दहशत निर्माण केली.
फिर्यादी हे सायंकाळी अंबड एमआयडीसीतून घरी जात असताना आरोपींनी प्रणय स्टम्पिंग कंपनीच्या पुढे कामटवाडा रस्त्यावर फिर्यादीची गाडी अडवून त्यांना जिवे ठार मारण्याची धमकी दिली, तसेच सहा लाख रुपयांच्या खंडणीची मागणी करून दीड लाख रुपये खंडणीस्वरूपात स्वीकारले.
हा प्रकार दि. ३० ऑक्टोबर ते १४ नोव्हेंबरदरम्यान घडला. या प्रकरणी अंबड पोलीस ठाण्यात संतोष शर्मासह इतर चार जणांविरुद्ध खंडणी व धमकीचा गुन्हा दाखल करण्यात आला असून, पुढील तपास पोलीस उपनिरीक्षक लाड करीत आहेत.
