नाशिक (भ्रमर प्रतिनिधी) : तपासादरम्यान पोलीस कोठडीतील आरोपी पोलिसाच्या हाताला झटका देऊन पळून गेल्याची घटना घडली.
याबाबत पोलीस उपनिरीक्षक निसाद नजीर शेख यांनी दिलेल्या फिर्यादीत म्हटले आहे, की मुंबई नाका पोलीस ठाण्याकडील दाखल गुन्ह्याचा तपास करीत असताना या गुन्ह्यातील आरोपी नवाज हसन खान (वय २२, रा. वडाळा गाव, नाशिक) याला अटक करण्यात आली.
या आरोपीस न्यायालयात हजर करून त्याची पोलीस कोठडीची रिमांड घेण्यात आली आहे. त्याच्याकडे तपास करून त्याला सुरक्षेच्या कारणास्तव भद्रकाली पोलीस ठाण्याच्या लॉकअपमध्ये ठेवण्यात आले.
सदर पोलीस कोठडीतील आरोपी नवाज हसन खान याला तपासाकामी बाहेर काढले होते. तपासादरम्यान पोलीस कोठडीतील आरोपी नवाज खान याने केलेल्या निवेदनाप्रमाणे पंचनामा करीत असताना आरोपीने पोलीस उपनिरीक्षक शेख यांची नजर चुकवून बेडीमधून अलगद हात काढून फिर्यादीच्या हाताला जोराचा झटका मारून बजरंगवाडीच्या दिशेने पलायन केले.
या प्रकरणी मुंबई नाका पोलीस ठाण्यात गुन्हा दाखल करण्यात आला असून, पुढील तपास पोलीस हवालदार खान करीत आहेत.
