साधुग्रामच्या नावाखाली तपोवनातील हिरवाई नष्ट करून दिल्लीतील प्रगती मैदानच्या धर्तीवर अत्याधुनिक, भव्य प्रदर्शनी केंद्र (भारत मंडपम) उभारण्याचा डाव रचल्याचा आरोप पर्यावरणप्रेमींकडून होत आहे. दुसरीकडे महापालिका अधिकतम झाडे वाचविली जातील, या प्रकल्पाचा झाडांशी कुठलाही संबंध नसल्याचा दावा करीत आहे.
तपोवनातील वृक्षतोडीच्या विषयावर शंकराचार्य अविमुक्तेश्वरानंद सरस्वती यांनी राज्य सरकार व कुंभमेळा प्राधिकरणावर टिकास्त्र सोडले. नाशिकच्या कुंभमेळ्याचा आनंद घेण्यासाठी साधू-महंत उत्सुक असताना तपोवनातील वृक्ष कापून साधुग्राम तयार करण्याच्या योजनेची माहिती समोर आली. असा कोण महंत वा धार्मिक व्यक्ती असेल जो कुंभमेळ्यात स्नान करण्यासाठी जाईल आणि वृक्ष तोडीचे पाप आपल्या माथी घेऊन परत येईल ?
वृक्ष तोडून साधू-महंतांच्या निवास व्यवस्थेची मागणी कोणी करीत असेल तर तो साधू समाज व हिंदू समाजाचा अंग होऊ शकत नाही. वृक्ष कापणे मोठे पाप आहे. आणि हे तर तपोवनातील वृक्ष आहेत. या वृक्षांच्या खाली किती साधू-संतांनी आजवर तपश्चर्या केली आहे. त्यामुळे या वृक्षांच्या खाली थोडावेळ कोणी बसले तर अध्यात्माचे भाव उमटतात. वृक्षतोड करून सरकार साधू-महंत व भाविकांसाठी व्यवस्था करीत नसून ती कुंभमेळ्यानंतरसाठी करीत असल्याचा आरोप त्यांनी केला.
कुंभमेळ्याच्या नावावर सरकार वृक्षतोड करेल आणि साधू-महंतांची किती चांगली व्यवस्था केली हे दाखवेल. कुंभमेळा झाल्यानंतर वृक्षतोड झालेली असेल. तेव्हा एकतर या ठिकाणी सरकारी योजना लादली जाईल, नाहीतर ही जागा आपल्या एखाद्या व्यक्तीच्या ताब्यात दिली जाईल, असा आरोप करीत या वृक्षतोडीला शंकराचार्य अविमुक्तेश्वरानंद सरस्वती यांनी विरोध केला.
