मुंबई : भारतीय शेअर बाजारात बुधवारी मोठी घसरण नोंदवली गेली आहे. अमेरिकेतील कमजोर उत्पादन डेटामुळे पुन्हा एकदा जगावर मंदीची टांगती तलवार आहे. यूएसमधील या घडामोडींचा जागतिक बाजारावरही परिणाम झाला आणि जगभर विक्रीचा दबाव वाढला तर भारतीय शेअर मार्केटही याला अपवाद ठरले नाही.
मंगळवारी अमेरिकन बाजारांमध्ये खळबळ उडाली, ज्यामुळे मंदीचा धोका पुन्हा एकदा वाढताना दिसत आहे. डाऊ जोन्सपासून नॅसडॅकपर्यंत मोठी घसरण नोंदवली गेली ज्याचे पडसाद गिफ्ट निफ्टीवरही दिसून आले. भारतीय बाजारांबद्दल बोलायचे तर, आठवड्याच्या तिसऱ्या व्यवहाराच्या दिवशी, बुधवारी, सेन्सेक्स-निफ्टीमध्ये दबाव दिसून आला आणि व्यवहार सुरू होताच शेअर बाजार कोसळला.
गुंतवणूकदारांचे लाखो कोटी स्वाहा
सुरुवातीच्या सत्रात निफ्टी आयटी, PSU बँक आणि मेटल एक टक्क्यांनी घसरले तर NSE वर ONGC, विप्रो आणि LTIM दोन टक्क्यांनी खाली आले. या घसरणीमुळे गुंतवणूकदारांचे झटक्यात ३.१ लाख कोटी रुपयांचे नुकसान झाले असून BSE वर सूचीबद्ध कंपन्यांचे मार्केट कॅप ३.१ लाख कोटी रुपयांनी घसरून ४६२.४ लाख कोटी रुपयांवर आले आहे.
शेअर बाजारात घसरणीचे वर्चस्व
सुरुवातीच्या घसरणीमुळे जीआयसीच्या शेअर्समध्ये ५ टक्क्यांची पडझड नोंदवली गेली असून सरकार या कंपनीतील आपला काही हिस्सा ऑफर फॉर सेलच्या माध्यमातून कमी करत आहे. यादरम्यान, KIMS शेअर्स २,६५५ रुपयांच्या सर्वकालिक उच्चांकावर पोहोचले आणि स्टॉक स्प्लिटची एक्स-डेट जाहीर केल्यापासून कंपनीच्या शेअर्समध्ये तेजीचा हिरवा रंग चढला आहे. सेन्सेक्सच्या घसरणीत इन्फोसिस, ICICI बँक, लार्सन अँड टुब्रो, टीसीएस, भारती एअरटेल आणि एसबीआयची सर्वात मोठी भूमिका राहिली तर JSW स्टील आणि टाटा स्टील १.५% घसरले.
