नाशिक जिल्ह्यातील प्रसिद्ध तीर्थक्षेत्र त्र्यंबकेश्वर मंदिरात देशासह जगभरातून मोठ्या संख्येने भाविक येत असतात. भाविकांची मोठी गर्दी होत असल्याने दर्शनासाठी कायमच येथे रांगा लागतात.
मंदिरात दर्शनासाठी होणारी प्रचंड गर्दी टाळण्यासाठी आणि वेळेची बचत करण्यासाठी अनेक भाविक जलद दर्शनाच्या शोधात असतात. त्याचाच फायदा घेऊन त्र्यंबकेश्वरला भाविकांची फसवणूक होत असल्याचा धक्कादायक प्रकार समोर आला आहे.
त्र्यंबकेश्वर मंदिरात दर्शनासाठी जास्त पैसे घेऊन खोटे तिकीट विकल्याचा धक्कादायक प्रकार उघडकीस आला आहे. याबाबत मंदिर ट्रस्टचे मुख्य कार्यकारी अधिकारी अमित माचवे यांनी त्र्यंबक पोलीस ठाण्यात गुन्हा दाखल केला आहे. गुजरात राज्यातील सूरत येथील भविकासोबत असा प्रकार घडला असून थेट दर्शनासाठी असलेली 200 रुपयांची तीन व्हीआयपी तिकिटे मंदिराच्या प्रवेशद्वाराजवळ भेटलेल्या एका व्यक्तीने 2 हजार रुपयांनी विकली. मात्र, ही तिकिटे मंदिराच्या प्रवेशद्वारी असलेल्या संगणकीय स्कॅनिंग यंत्राने स्वीकारली नाही म्हणून हा फसवणुकीचा प्रकार उघडकीस आला.
त्र्यंबकेश्वर मंदिरात दर्शनासाठी जास्त पैसे घेऊन खोटे पास विकल्याचा प्रकार उघडकीस आला आहे. २२ मार्च रोजी घडलेला हा सगळा प्रकार आहे. गुजरात राज्यातील सुरत येथून काही भाविक त्र्यंबकेश्वरला दर्शनासाठी आले होते. मंदिराच्या प्रवेशद्वारावर त्यांना भेटलेल्या एका व्यक्तीने व्हीआयपी दर्शनासाठीची प्रत्येकी दोनशे रुपये किमतीची तीन तिकिटे दोन हजार रुपयांना विकल्याचं समोर आलं आहे.
आपली फसवणूक झाल्याचे लक्षात आल्यानंतर सदर भाविकांनी त्र्यंबकेश्वर मंदिर ट्रस्ट कार्यालयात लेखी तक्रार केली. त्यानंतर ट्रस्टने पोलिसांकडे याबाबत तक्रार दिली असता अदखलपात्र गुन्हा दाखल करण्यात आला होता.
यावेळी सीसीटीव्ही तपासात संशयित नारायण मुर्तडक या तरुणाने ही तिकिटे विकल्याचे दिसून आले. यानंतर याप्रकरणी त्र्यंबकेश्वर देवस्थान ट्रस्टचे मुख्य कार्यकारी अधिकारी अमित माचवे यांनी पोलिसांकडे मुर्तडक याच्याविरुद्ध ठकबाजीचा गुन्हा नोंदवला आहे.
कसं आलं लक्षात ?
दर्शन पाससाठी संबंधित भाविकांचा आधार क्रमांक जुळवला जातो. तिन्ही पास इतरांच्या आधार क्रमांकावर काढलेली असल्याने सुरतच्या भाविकांचे आधार क्रमांक त्याच्याशी जुळले नाहीत. त्यामुळे मंदिराच्या प्रवेशद्वारी असलेल्या संगणकीय स्कॅनिंग यंत्राने ती स्वीकारली नाहीत. त्यामुळे सुरक्षा रक्षकांनी या भाविकांना प्रवेश दिला नाही, त्यांना बाहेर जाण्यास सांगितले. त्यावेळी आपली फसवणूक झाल्याचे त्यांच्या लक्षात आले.
देवस्थान ट्रस्टने याबाबतचे सीसीटीव्ही फुटेज तपासून पाहिले आहेत. संबधित फुटेज राखून ठेवण्यात आले आहे. २३ मार्च २०२५ रोजी अमित माचवे यांनी दिलेल्या तक्रार अर्जावरून मंगळवारी (ता. १५ एप्रिल) फिर्याद दाखल करून घेण्यात आली. याबाबत नारायण मुर्तडक या व्यक्तीवर कलम ३१८ (४) प्रमाणे ठकबाजीचा गुन्हा नोंदवण्यात आला आहे.
