सोलापूर : सोलापूरमध्ये एक अतिशय हृदयद्रावक घटना समोर आली आहे. अपघातात मृत्यू झालेल्या वडिलांचा अंत्यविधी उरकून परतताना मुलाचाही अपघातात मृत्यू झाला आहे. या घटनेनं सर्वत्र हळहळ व्यक्त केली जात आहे.
याबाबत मिळालेल्या माहितीनुसार , हर्षद झंकर योगी (वय ३५) असं मृत मुलाचं नाव आहे. या अपघातात चार जण जखमी झाले असून दोघांची प्रकृती चिंताजनक आहे. बंगळुरू येथे वडिलांचा अपघाती मृत्यू झाला होता. त्यांचा अंत्यविधी उरकून गुजरातकडे परत जाताना मुलाच्या वाहनाला १३ मे रोजी करमाळा-कुर्डुवाडी रस्त्यावरील वरकुटे इथं पहाटे साडेचार वाजण्याच्या सुमारास हा अपघात झाला आहे.
रेल्वेतून पडून झाला होता वडिलांचा मृत्यू
पोलिसांनी दिलेल्या माहितीनुसार, गुजरात येथील एक नेपाळी कुटुंब हे बंगळुरू येथे गेले होते. परत गुजरातकडे जाताना रेल्वेतून पडून झंकार योगी यांचा मृत्यू झाला होता. झंकर योगी यांच्या कुटुंबातील सदस्य अंत्यविधी उरकून परत गावी गुजरातकडे निघाले होते. मात्र १३ मे रोजी पहाटे कुर्डुवाडीवरून येत असताना वरकुटे गावाजवळ कार आली असता रस्त्याच्या कडेला असलेल्या एका लिंबाच्या झाडावर जाऊन कार आदळली. यामध्ये झंकार योगी यांचा मुलगा हर्षद योगी जागीच ठार झाला आहे.
रस्त्याच्या कडेला भीषण अपघात झाल्याची माहिती मिळताच ग्रामस्थांनी घटनास्थळी धाव घेतली. अपघाताची माहिती स्थानिक ग्रामस्थांनी पोलिसांना दिल्यानंतर पोलीस व रुग्णवाहिका यांनी तातडीने अपघातस्थळी दाखल झाली. अपघातग्रस्त वाहनांमधील मयत व जखमींना बाहेर काढून त्यांना करमाळा येथील उपजिल्हा रुग्णालयात दाखल करण्यात आले.
