नाशिक : 5 हजारांची लाच घेऊन एसीबीच्या पथकाला पाहताच हवालदाराने धूम ठोकली. ही घटना घोटी येथे घडली. राजाराम रुंजा डगळे (पोलीस हवालदार घोटी पोलीस ठाणे, नाशिक ग्रामीण, रा. पोलीस मुख्यालय वसाहत, नाशिक ग्रामीण) अशी हवालदाराबाबत अधिक माहिती आहे.
तक्रारदार यांची प्लेटिना कंपनीची मोटरसायकल MH 15, JU 0702 असून तक्रारदारांची मुलगी आजारी पडल्याने तिच्या औषधोपचाराकरिता त्यांच्याकडे पैसे नसल्याने त्यांनी ही मोटरसायकल योगेश पुंजाजी वाघ यांच्याकडे गहाण ठेवून त्यांच्याकडून 12,000 रुपये उसने घेतले होते.तक्रारदार यांनी योगेश वाघ यांना त्यांच्याकडून मोटरसायकल गहाण ठेवून घेतलेले 15,000 रुपये व्याजासह परत करूनही त्यांनी तक्रारदार यांना त्यांची मोटरसायकल परत केलेली नाही म्हणून तक्रारदाराने योगेश वाघ यांच्याकडे मोटरसायकल परत घेण्यासाठी तगादा लावला.
त्यांनी तक्रारदार यांचे घरी येऊन त्यांना आणि त्यांच्या पत्नीला मारहाण केली. म्हणून तक्रारदार यांच्या पत्नीने वाघ यांच्या विरुद्ध घोटी पोलीस स्टेशन येथे एन सी नोंद केली होती. तेव्हा तेथील पोलीस स्टेशनचे पो.हवा. राजाराम डगळे यांनी तक्रारदारांची मोटरसायकल त्यांना परत मिळवून देऊन त्या मोबदल्यात तक्रारदारांकडे 15,000 रुपये लाचेची मागणी केली. तडजोडीअंती 10,000 रुपये ठरले. यावेळी पहिला हप्ता 5,000 रुपये स्वीकारताना सापळा पथक ताब्यात घेण्यासाठी तेथे गेले असता पथकास लाचखोर अधिकाऱ्याने तिथून पळ काढला. पोलीस हवालदाराच्या विरुद्ध घोटी पोलीस स्टेशन येथे भ प्र अधिनियम कलमाने गुन्हा दाखल करण्यात आला आहे.
