सातपूर - अशोकनगर परिसरात एका १६ वर्षीय युवकाचा संशयास्पद मृत्यू झाला होता.
याप्रकरणी शव विच्छेदन अहवाल आल्यानंतर खुनाचा गुन्हा दाखल करण्यात आला आहे. पोलिसांनी दोन अल्पवयीन मुलांना याप्रकरणी ताब्यात घेतले आहे. या घटनेने परिसरात खळबळ उडाली होती.
याबाबत पोलिसांनी दिलेली माहिती अशी की, मयत यशराज तुकाराम गांगुर्डे (वय १६, रा. पवार संकुल, अशोकनगर) याचे त्याच्या क्लास मधील मुलांसमवेत 31 जुलै रोजी बेंचवर बसण्यावरून वाद झाले होते. काल सायंकाळी ६.३० वाजेच्या सुमारास हिरे गार्डन जवळील खासगी शिकवणीजवळ त्याचे पुन्हा त्या मुलांसमवेत वाद झाले.
यावेळी दोघांनी त्याला लाथा बुक्क्यांनी मारहाण केली. त्याला जबर मारहाण झाल्याने त्याचा यात मृत्यू झाला. तातडीने त्याला नाशिकच्या शासकीय रुग्णालयात दाखल करण्यात आले. मात्र, डॉक्टरांनी त्याला तपासून मृत घोषित केले. कोविडमध्ये यशराजचे पितृछत्र हरपले होते.
या प्रकरणी सातपूर पोलीस ठाण्यात गुन्हा दाखल करण्यात आला असून पुढील तपास सहाय्यक पोलीस निरीक्षक भडांगे करीत आहेत.
