नाशिकरोड येथील मध्यवर्ती कारागृहात एक खळबळजनक घटना घडली आहे. लैंगिक अत्याचार प्रकरणी बंदिवान असलेल्या ५८ वर्षीय शिवदास भालेराव या कैद्याने आत्महत्या केली आहे. या घटनेनं कारागृहात खळबळ उडाली आहे. शिवदास भालेराव या बंदीवानाने गळफास घेऊन आत्महत्या केल्याची धक्कादायक घटना रविवारी (दि. 26 ऑक्टोबर) दुपारच्या सुमारास उघडकीस आली.
रविवारी दुपारच्या सुमारास भालेराव याने कारागृहातील एका ठिकाणी कशाच्या तरी साहाय्याने गळफास घेतल्याचे कारागृह प्रशासनाच्या लक्षात आले. घटनेची माहिती मिळताच कारागृहातील पोलीस अंमलदारांनी तातडीने त्यांना खाली उतरवून शासकीय जिल्हा रुग्णालयात सव्वा तीनच्या सुमारास दाखल केले. मात्र, तेव्हा वैद्यकीय अधिकाऱ्यांनी तपासणी करून कैद्याला मृत घोषित केले.
भालेराव याला एका अल्पवयीन मुलीवर लैंगिक अत्याचार (बलात्कार) केल्याप्रकरणी पोलिसांनी अटक केली होती. या गुन्ह्यात त्याला न्यायालयीन कोठडी सुनावण्यात आली होती. जून 2024 पासून तो नाशिकरोड मध्यवर्ती कारागृहात शिक्षा भोगत होता.भालेराव हा सिन्नर तालुक्यातील रहिवासी होता.
या घटनेची नाशिकरोड पोलीस ठाण्यात अकस्मात मृत्यूची नोंद करण्यात आली आहे. आत्महत्येचे नेमके कारण अद्याप अस्पष्ट आहे. पोलीस आणि कारागृह प्रशासन या प्रकरणाचा सखोल तपास करत आहेत. मात्र, या घटनेमुळे नाशिकरोड मध्यवर्ती कारागृहात एकच खळबळ उडाली आहे.
