मनोज जरांगे यांच्या घातपाताचा कट रचल्याच्या प्रकरणी जालना पोलिसांनी आणखी एकाला बेड्या ठोकल्या. जालना पोलिसांनी मंगळवारी रात्री बीडमधून कांचन साळवी याच्या मुसक्या आवळल्या. याआधी दादा गरुड, अमोल खुणे यांना पोलिसांनी अटक केली असून चौकशी करण्यात येत आहे.
मराठा आंदोलक मनोज जरांगे पाटील यांच्या जीवे मारण्याच्या कटातील संशयित आरोपी कांचन साळवे याला जालना पोलिसांनी रात्री उशिरा बीडमधून अटक केली आहे. कांचन साळवे हा माजी मंत्री धनंजय मुंडे यांचा समर्थक असून बीड शहरातील काही कामे तो पाहायचा अशी प्राथमिक माहिती समोर आली आहे. काही दिवसांपूर्वी हत्याच्या कटाचा खुलासा करताना मनोज जरांगे पाटील यांनी पत्रकार परिषदेत कांचन साळवे याचे नाव घेतले होते.
दादा गरुड आणि अमोल खुणे यांच्याशी कांचन नावाच्या व्यक्तीचा सबंध असल्याचा आणि तो धनंजय मुंडे यांचा PA असल्याचा उल्लेख आणि आरोप मनोज जरांगे यांनी केला होता. मंगळवारी रात्री उशिरा कांचन साळवी याला जालना पोलिसांनी चौकशीसाठी ताब्यात घेतलं होतं. चौकशीनंतर पोलिसांनी त्याला अटक केली. आज त्याला जालन्यातील अंबड येथील न्यायालयात हजर करण्यात येणार आहे.
