काही दिवसांपासून नाशिकच्या राजकारणात अनेक घडामोडी पहायला मिळत आहे. शिंदे गटाला धक्का देऊन शिवसेनेत तर कोणी ठाकरे गटाला धक्का देत भाजपच्या वाटेवर जात आहे. ऐन निवडणुकीच्या तोंडावर नाशिकमध्ये भाजपात मोठ्या प्रमाणात पक्षप्रवेश सुरु आहेत. याचा थेट फटका इतर पक्षांना बसत आहे. आता नाशिकमध्ये पुन्हा एकदा ठाकरे गटाला मोठा धक्का बसलाय.
उद्धव ठाकरे गटातील शिवसेनेचे उपनेते अद्वय हिरे यांनी अखेर आपल्या राजकीय भूमिकेत मोठा बदल करत शिवसेनेला जय महाराष्ट केला आहे. आज मुंबईतील भाजप कार्यालयात अधिकृतपणे अद्वय हिरे प्रवेश करणार आहे. हिरे यांच्या निर्णयामुळे नाशिकच्या राजकीय समीकरणात भाजपची ताकद आणखी वाढणार असून उद्धव ठाकरे पक्षासाठी हा मोठा धक्का मानला जात आहे.
दरम्यान, मालेगाव बाह्य मतदारसंघात शालेय शिक्षणमंत्री दादा भुसे यांची पकड मजबूत होत असतानाच, भुसे यांचे कट्टर विरोधक अद्वय हिरे यांनी महायुतीत प्रवेश करीत पुन्हा एकदा राजकीय पुनरागमन साधले आहे. गेल्या काही दिवसांपासून ते भाजप नेत्यांच्या संपर्कात असल्याच्या चर्चा होत्या, त्या अखेर स्वतः हिरे यांनीच पुष्टी करत या पक्षप्रवेशावर शिक्कामोर्तब केले.
विधानसभा निवडणुकीत हिरे यांनी दादा भुसे यांना कडवी झुंज दिली होती, त्यामुळे त्यांच्या नव्या राजकीय पावलाने स्थानिक राजकारण अधिक तापण्याची शक्यता आहे. पण अद्वय हिरे यांचा भाजपातील पक्षप्रवेश ठाकरे गटासाठी मोठा धक्का मानला जात आहे.
