लहान मुलांना अनेक चुकीच्या सवयी असतात. चुकीतूनचं मुलं शिकतात. त्यातील एक गोष्ट म्हणजे अंथरूण ओलं करणे. मुलांच्या या सवयीमुळे अनेक पालक त्रस्त देखील असतात. मात्र कोल्हापुरातून अशी एक घटना समोर आली आहे जी ऐकल्यावर कुणाचाही संताप होईल , येथे एका सावत्र आईने पाच वर्षाच्या मुलीला उलथनं गरम करुन तोंडावर चटके दिल्याचा संतापजनक प्रकार उघडकीस आला आहे.
याबाबत मिळालेल्या माहितीनुसार , अंथरूणात लघुशंका केल्याच्या कारणास्तव हे भयानक कृत्य केल्याचं समोर आलं आहे. ही घटना कासारवाडीतील आहे. शिरोली पोलीस ठाण्यात या घटनेचा गुन्हा नोंद झाला आहे. पूजा मगरे असं या प्रकरणातील आरोपी महिलेचं नाव आहे.
शिरोली पोलिसांकडून मिळालेल्या माहितीनुसार, फिर्यादी शुभम मोकिंदराव मगरे यांनी आरोपी पुजा शुभम मगरे (वय 23) हिच्यासोबत दुसरं लग्न केलं. दोघांनाही पहिल्या लग्नापासून प्रत्येक एक एक मुली आहेत. 13 सप्टेंबर 2024 रोजी मुलीचे वडील कामावर गेले असताना आरोपी पुजा मगरे ही सावत्र मुलीने (वय 5)अंथरुणात लघुशंका केली म्हणून रागावली. मुलीला भीती दाखविण्यासाठी तिने घरातील उलथने गरम करून तिच्या गालावर, ओठावर, गळयाजवळ, लघवीचे वरच्या बाजूला व मांडीवर चटके दिले.
मुलीला शरीरभर खूप ठिकाणी जखमा झाल्या होत्या. मुलगी लहान असल्यामुळे झालेल्या जखमांचे गांभीर्य तिच्या लक्षात आले नाही. तिच्या जखमा पाहून शेजारच्यांनी तिची विचारपूस केली. तरीही चिमुकली हसत -खेळत होती. आईने गरम उलथनं करून चटके दिल्याचं सांगितलं आणि अंगावरील सर्व जखमा दाखवल्या. गावातील सरपंचाला याबाबत कळताच त्यांना वडिलांना जाब विचारला. शेवटी सरपंचाने आरोपीला पोलिसांच्या ताब्यात दिलं. आरोपी पुजा शुभम मगरे विरोधात पोलीस ठाण्यात गुन्हा दाखल करण्यात आला आहे. पोलिसांकडून पुढील तपास सुरू आहे.
