नाशिकरोड (भ्रमर प्रतिनिधी):- शहरातील बांधकाम व्यावसायिक व विकासकांना सल्ला देणाऱ्या संचालिकेचा कमिशनचे पैसे मागण्यास गेल्यानंतर नकार देत अश्लिल शिवीगाळ व अंगाशी झटापट करत विनयभंग करण्यात आल्याची घटना घडली असून उपनगर पोलिसांनी चौघा बांधकाम व्यावसायिकांविरुद्ध गुन्हा दाखल केला आहे.
तपोवन रोडवरील मेट्रो मॉलसमोर ईश्वर प्रतिक ग्रँड या गृह प्रकल्पाच्या कार्यालयात ही घटना घडली आहे. यात कनक डेव्हलपर्सचे भागीदार तरुण शंकर समनानी, राहुल रामचंद्र राठी, योगेश शंकर समनानी, शंकर समनानी यांच्याविरुद्ध विनयभंगाचा गुन्हा नोंदवण्यात आला आहे.
यातील पिडिता या आपल्या पार्टनरसह १६ वर्षांपासून मुंबईसह नाशिकमधील बांधकाम व्यावसायिक व विकासकांना सल्ला देण्याचा व्यवसाय करतात.ते व संशयित यांच्यात ईश्वर प्रतिक ग्रँड या गृह प्रकल्पाच्या विक्रीचा करारनामा झाला होता. त्यासाठी पिडितेला दोन टक्के कमिशन निश्चित करण्यात आले होते.
त्यानुसार २४ निवासी युनिट पिडीतेने विकल्या. मात्र संशयतांनी पाच ते सहा युनिटची परस्पर विक्री केली. आपली फसवणूक होत असल्याचे पाहून पिडीतेने व्यावसायिकांकडे कमिशनच्या पैशांची मागणी केली असता उडवाउडवीचे उत्तरे देण्यात आली. त्यानंतर पिडिता व पार्टनर यांना कार्यालयात बोलावून करारनाम्याची मूळ प्रत हिसकावून घेण्यात आली. यावेळी स्त्री मनास लज्जा उत्पन्न होईल असे वर्तन करण्यात आले.
तसेच अश्लिल शिवीगाळ करत 'आम्ही नाशिकमधील टॉप लेवलची माणसे आहोत. आमचे काम बिघडवणार. जा कोणाकडे जायचे ते', असे बोलून पुन्हा कार्यालयात आलीस तर जिवंत ठेवणार नाही अशी धमकीही देण्यात आली. यामुळे भेदरलेली पिडिता कार्यालयाबाहेर आल्यानंतर संशयीतांनी तिला हाताने धक्का देत लोटून दिले.
या प्रकरणी पीडित महिलेने दिलेल्या फिर्यादीवरून उपनगर पोलिसांनी गुन्हा नोंदवला असून वरिष्ठ पोलीस निरीक्षक जितेंद्र सपकाळे यांच्या मार्गदर्शनाखाली उपनिरीक्षक पावरा तपास करत आहेत.
