नाशिक :- 40 हजार रुपयांची लाच घेताना जळगाव जिल्ह्याच्या पारोळा तालुक्यातील तामसवाडी ग्रामपंचायतीच्या ग्रामपंचायत अधिकाऱ्याला लाच लुचपत प्रतिबंधक विभागाने रंगेहाथ पकडले आहे.
दिनेश वासुदेव साळुंखे (वय 53, रा. आई बंगला, भालेराव नगर, कॉटन मार्केटच्या मागे, अमळनेर, जि. जळगाव) असे लाच घेणाऱ्या अधिकाऱ्याचे नाव आहे.
याबाबत अधिक माहिती अशी की, तक्रारदार हे शासकीय बांधकाम ठेकेदार असून त्यांनी महाराष्ट्र शासनाच्या दलित वस्ती सुधार अंतर्गत मौजे तामसवाडी ग्रामपंचायतच्या रस्ता कॉंक्रिटीकरणाचे पाच लाख रुपये किमतीचे काम घेऊन पूर्ण केले होते. या झालेल्या कामाचे चार लाखाच्या बिलाचा चेक आरोपी साळुंखे यांनी तक्रारदार यांना अदा करून सदरची रक्कम तक्रारदार यांच्या बँक खात्यात जमा झाली होती.
त्यानंतर तक्रारदार व त्यांचे चुलत काका असे तक्रारदार यांनी घेतलेल्या दुसऱ्या कामाची चौकशी करण्याकरिता सुमारे 7 दिवसांपूर्वी तामसवाडी ग्रामपंचायत कार्यालयात गेले असता तेथे साळुंखे यांनी तक्रारदार यांच्याकडे त्यांना अदा केलेल्या बिलाच्या रकमेच्या 10 टक्के प्रमाणे 40,000 रुपये लाचेची मागणी केल्याने तक्रारदार यांनी दूरध्वनी द्वारे माहिती दिली होती.
या माहितीवरून ला.प्र.वि. धुळे पथकाने पारोळा येथे जाऊन तक्रारदार यांची भेट घेऊन त्यांची तक्रार नोंदवून घेतली होती. या तक्रारीची दि. 19.05.2025 रोजी पडताळणी केली असता साळुंखे यांनी तक्रारदार यांच्याकडे 40,000 रुपये लाचेची मागणी करून ही लाचेची रक्कम अंमळनेर येथे दगडी दरवाजा समोर राजे संभाजी चौकात स्वतः स्वीकारून दुचाकी वर पळून गेले होते.
त्यानंतर त्यांचा शोध घेऊन त्यांना ताब्यात घेण्यात आले असून त्यांचे विरुद्ध अमळनेर पोलीस स्टेशन येथे भ.प्र.अधिनियम कलमाने गुन्हा दाखल करण्याचे काम सुरू आहे.
